„კრიტიკას ვიმსახურებ“ - ბელინგემმა ხალხს თავი შეახსენა

ჯუდ ბელინგემმა აღიარა, რომ მის მიმართ გამოთქმული კრიტიკა ხშირად სამართლიანია.

ეს განცხადება მადრიდის რეალის ვარსკვლავმა მსოფლიო ჩემპიონატის სასტარტო მატჩში ხორვატიის 4:2 განადგურების შემდეგ გააკეთა, სადაც თავადაც გამოიჩინა თავი და შეხვედრის ერთ-ერთი მთავარი გმირი გახდა.

პასუხი კრიტიკოსებს და მოტივაცია

ბელინგემმა მკაფიოდ აღნიშნა, რომ მისი მთავარი მიზანი ნაკრების დახმარებაა, გარედან წამოსულ ნეგატივს კი უბრალოდ ფილტრავს. მიუხედავად იმისა, რომ ბოლო თვეებში მას როგორც კლუბში, ისე ნაკრებში არსებული კოსმოსური მოლოდინების გამო ხშირად აკრიტიკებდნენ, ფეხბურთელი რეალობას საღად აფასებს:

ეს ფეხბურთის ნაწილია. გულში ბოღმას არავის მიმართ ვიდებ, ვინც ჩემზე ცუდს ამბობს, რადგან ზოგჯერ კრიტიკას მართლაც ვიმსახურებ. დღეს კარგი დღე იყო იმისთვის, რომ ხალხისთვის შემეხსენებინა, ვინ ვარ სინამდვილეში.

დალასში გამართულ მატჩში ბელინგემმა არა მხოლოდ გოლი გაიტანა, არამედ დაცვაშიც უდიდესი სამუშაო შეასრულა, რითაც ინგლისს მოედნის ცენტრზე კონტროლი მოაპოვებინა და ტაქტიკური დისციპლინის შესახებ არსებული კითხვები გააქრო.

ტუხელისა და პიკფორდის ინციდენტი

ბელინგემმა უარყო ხმები ნაკრებში არსებული დაპირისპირების შესახებ, რომელიც პირველი ტაიმის მიწურულს თომას ტუხელსა და ჯორდან პიკფორდს შორის მომხდარ ემოციურ შელაპარაკებას მოჰყვა. ნახევარმცველის თქმით, გასახდელში არანაირი დრამა არ ყოფილა:

ეს არ ყოფილა ისეთი მომენტი, სადაც ვინმე ყვიროდა ან სკანდალს აწყობდა. მწვრთნელმა მშვიდად გვითხრა ის, რაც გუნდს სჭირდებოდა. ჩვენ საკმარისად მომწიფებული ფეხბურთელები და ლიდერები გვყავს იმისთვის, რომ ყველამ თავისი საქმე იცოდეს

ინგლისის ნაკრები მუნდიალზე მომდევნო მატჩს 23 ივნისს, განის წინააღმდეგ გამართავს.