კრიშტიანუ რონალდუს გარშემო ატეხილი სატრანსფერო და სათამაშო კრიტიკა მუნდიალზე ახალ მასშტაბებს იღებს.
კონგოს დემოკრატიულ რესპუბლიკასთან ფრეს (1:1) შემდეგ, განის ნაკრებისა და მილანის ყოფილმა ნახევარმცველმა, კევინ-პრინს ბოატენგმა განაცხადა, რომ პორტუგალიის წარმატებისთვის 41 წლის კაპიტანმა სკამზე უნდა გადაინაცვლოს.
„ის ახალგაზრდებს ხელს უშლის“
ბოატენგმა SBS Sport-ის ეთერში აღნიშნა, რომ რონალდუს ავტორიტეტი გუნდზე ტაქტიკურად ცუდად მოქმედებს, რადგან ფეხბურთელები მოედანზე თავს ვალდებულად თვლიან, ბურთი ყოველთვის მას მისცენ:
მართალი გითხრათ, რონალდუ ნამდვილი გუნდური მოთამაშე რომ იყოს, გვერდზე გადგებოდა და გზას ახალგაზრდებს დაუთმობდა. პორტუგალია მის გარეშე ბევრად უკეთესი გუნდია. როდესაც ის მოედანზეა, გუნდზე უზარმაზარი წნეხია, რადგან ყველას მხოლოდ მასზე თამაში უნდა
ბოატენგმა დაამატა, რომ კრიშტიანუს დიდი ფანია, თუმცა ასაკის გამო ის უკვე სხვა მოთამაშეა. მისი აზრით, რობერტო მარტინესმა რონალდუ მხოლოდ მატჩის ბოლო 15-20 წუთზე უნდა შემოიყვანოს, თუ სურს, რომ ნაკრებმა მუნდიალზე შორს წავიდეს.
ანტირეკორდი მუნდიალების ისტორიაში
კონგოსთან მატჩში რონალდუმ ისტორია კი დაწერა - გახდა ყველაზე ასაკოვანი მოედანი ფეხბურთელი (41 წლის და 132 დღის), ვინც მსოფლიო ჩემპიონატზე ძირითადში დაიწყო, თუმცა მისი თამაში კატასტროფა იყო. Opta-ს მონაცემებით, მას ბურთთან მხოლოდ 25 შეხება ჰქონდა, რაც მის კარიერაში ყველაზე დაბალი მაჩვენებელია. გარდა ამისა, მან შეხვედრა კარში დარტყმის გარეშე დაასრულა.
მიუხედავად ამისა, რობერტო მარტინესი კაპიტანს კვლავ იცავს და დიდი ალბათობით, უზბეკეთთან მომავალ მატჩში რონალდუ ისევ სასტარტო შემადგენლობაში იქნება.
