ატლეტიკ ბილბაოსთან გამარჯვების შემდეგ, ბარსელონამ მთელი ყურადღება ჩემპიონთა ლიგის მერვედფინალზე გადაიტანა.
ჰანსი ფლიკი და მისი გუნდი უკვე ინგლისში იმყოფებიან და სენტ-ჯეიმს პარკზე ნიუკასლთან მატჩისთვის ემზადებიან.
კატალონიელებისთვის დიდი დანაკლისია ფრენკი დე იონგის არყოფნა. მის ნაცვლად მოედანზე, სავარაუდოდ, მარკ ბერნალი უნდა ვიხილოთ, რომელმაც ბოლო დროს ძირითად შემადგენლობაში ადგილი დაიმკვიდრა. თუმცა, ახალგაზრდა ფეხბურთელის გარშემო გარკვეული კითხვის ნიშნები გაჩნდა: ბილბაოსთან მატჩში ის შესვენებაზე შეცვალეს, მოგვიანებით კი გაირკვა, რომ ბერნალს კუჭის დისკომფორტი და შეუძლოდ ყოფნა აწუხებდა.
მიუხედავად ამისა, ბარსელონას ბანაკიდან კარგი ამბები ისმის, მოსალოდნელია, რომ ბერნალი სამშაბათის მატჩისთვის გამოჯანმრთელებას მოასწრებს. მან გუნდთან ერთად იმგზავრა და სამედიცინო შტაბის მეთვალყურეობის ქვეშ ვარჯიშსაც შეძლებს.
ნახევარდაცვაში ბრძოლა ამ მატჩის ბედს გადაწყვეტს. ბარსელონას საქმეს ისიც უადვილებს, რომ ნიუკასლს ტრავმირებული ბრუნო გიმარაეში დააკლდება. ფლიკის განკარგულებაში პედრი და ბერნალი არიან, რომლებმაც წესით სანდრო ტონალისა და ჟოელინტონის წინააღმდეგობას უნდა გაუძლონ. კლუბში დარწმუნებულები არიან, რომ ბერნალი თამაშს შეძლებს.
