კურტუა: „მაშფოთებს ის ფაქტი, რომ გოლის აღნიშვნას ვინის წინააღმდეგ იყენებენ"

მადრიდის რეალის მეკარემ, ტიბო კურტუამ, ბენფიკასთან ჩემპიონთა ლიგის საპასუხო მატჩის წინ გამართულ პრესკონფერენციაზე ვინისიუს ჟუნიორსა და ჯანლუკა პრესტიანის შორის მომხდარ რასისტულ სკანდალზე ისაუბრა.

შეგახსენებთ, რომ უეფამ მომხდარის გამო ბენფიკას ფორვარდი დროებით თამაშებს ჩამოაშორა. კურტუამ თანაგუნდელს სრული მხარდაჭერა გამოუცხადა:

„დროა, ფეხბურთში მსგავს რამეებს წერტილი დაესვას. ვინისიუსმა გვითხრა, რა უთხრა მას პრესტიანიმ. მსგავსი შემთხვევა უკვე ბევრჯერ მოხდა და ეს უნდა შევაჩეროთ. გადაწყვეტილებას უეფა იღებს. ჩვენ ვინისიუსის 100 პროცენტით გვჯერა. რადგან პრესტიანიმ პირზე მაისური აიფარა, სიმართლეს ვერასდროს გავიგებთ, თუმცა მე მას ვენდობი“, — განაცხადა ბელგიელმა.

კურტუამ ასევე უპასუხა ჟოზე მოურინიოსა და ბენფიკას პრეზიდენტის კრიტიკულ განცხადებებს, რომლებიც ვინისიუსის მიერ გოლის აღნიშვნასა და ფედერიკო ვალვერდეს ქმედებებს ეხებოდა:

„მოურინიო მოურინიოა. როგორც მწვრთნელი, შენ ყოველთვის დაიცავ შენს კლუბს. მაშფოთებს ის ფაქტი, რომ გოლის აღნიშვნას ვინისიუსის წინააღმდეგ იყენებენ. ჩვენ ვერ გავამართლებთ სავარაუდო რასისტულ აქტს მხოლოდ იმიტომ, რომ ვიღაცამ გოლი ემოციურად აღნიშნა“.