კვალიფიკაცია გაიარა - ბასილაშვილი ბრიუსელის ტურნირის ძირითად ბადეშია

ნიკოლოზ ბასილაშვილმა ბრიუსელის 250-ქულიანი ტურნირის საკვალიფიკაციო ეტაპი დასძლია და ძირითად ბადეში ითამაშებს.

ქართველმა ჩოგბურთელმა კვალიფიკაციის ფინალში ფრანგ პიერ-უგო ერბერს რთულ 3-სეტიან ბრძოლაში - 3:6; 6:3; 7:6 მოუგო. ნიკას 9 ეისი ჰქონდა და 1 ორმაგი შეცდომა დაუშვა. 24 ვინერსი შეასრულა და უნებლიედ 15-ჯერ შეცდა.

ერბერთან შეხვედრამდე, ბასილამ კიდევ ერთი ეტაპი გაიარა - ბელგიელ ალესიო ბასილეს ორ სეტში აჯობა.

ბრიუსელის ტურნირის ძირითად ბადეში ბასილაშვილის მეტოქე 28 წლის ფრანგი კუენტინ ალისი იქნება. ალისი ამჟამად მსოფლიოს 77-ე ჩოგანია - ბასილა მას ურთიერთშეხვედრებში 3:1-ს უგებს (წაგებული მატჩი ტრავმის გამო შეწყვიტა).

აღვნიშნოთ, რომ ტურნირზე პირველ ნომრად მსოფლიოს მე-8 ჩოგანი, იტალიელი ლორენცო მუზეტია განთესილი, ხოლო მე-2 ნომერი, მსოფლიოს მე-13 ჩოგანი, ფელიქს ოჟე-ალიასიმია. ATP-ის განახლებულ რეიტინგში ბასილაშვილი 101-ე პოზიციაზეა.