კვარა და ინგლისური გრანდები - ტოტენჰემის შეცდომა და არსენალის ინტერესი

პრემიერლიგის საჩემპიონო ტიტულის მოპოვების შემდეგ, არსენალი ზაფხულის სატრანსფერო ფანჯრისთვის გრანდიოზულ გეგმებს აწყობს. მიკელ არტეტას გუნდისთვის ოცნების სამიზნეს ქართველი შემტევი, ხვიჩა კვარაცხელია წარმოადგენს.

კვარაცხელიას მიმართ არსენალის ინტერესის ფონზე, მედიაში საინტერესო ისტორიული დეტალი გახდა ცნობილი. 2022 წელს, პანდემიის პერიოდის დასრულებისთანავე, ტოტენჰემს ჰქონდა შანსი, რომ ქართველი ფეხბურთელი რუბინიდან სულ რაღაც 20 მილიონად შეეძინა.

როგორც საფეხბურთო აგენტმა კრისტიან ემილემ ფაბრიციო რომანოსთან საუბარში აღნიშნა, ინგლისურმა კლუბებმა მაშინ რისკზე წასვლა ვერ გაბედეს:

იმ პერიოდში რუბინი 20 მილიონს ითხოვდა, თუმცა კლუბები პანდემიის დროს ამ თანხის გადასახდელად მზად არ იყვნენ. მათ არ ჰქონდათ საკმარისი ინფორმაცია ფეხბურთელზე, რადგან ის არ იყო დიდი საფეხბურთო ქვეყნიდან.

საბოლოოდ, კვარაცხელია 10 მილიონად ნაპოლიმ შეიძინა. იტალიურ კლუბში ჩატარებულ 107 მატჩში 30 გოლისა და 29 საგოლე გადაცემის ავტორი, 2025 წლის იანვარში პსჟ-ში 54.7 მილიონად გადავიდა.

ფრანგულ გრანდში კვარაცხელია ნამდვილ სუპერვარსკვლავად იქცა. მან გუნდს ჩემპიონთა ლიგა მოაგებინა, პარიზულ კარიერაში ჩატარებულ 79 შეხვედრაში კი უკვე 27 გოლი გაიტანა და 18 საგოლე გადაცემა შეასრულა.

25 წლის ქართველ ვარსკვლავს, რომელმაც 2025 წელს არსენალი საჯაროდ შეაქო, შანსი აქვს ზედიზედ მეორედ მოიგოს ჩემპიონთა ლიგა. 30 მაისს, ბუდაპეშტში გასამართ ფინალში, მისი პსჟ სწორედ არსენალს დაუპირისპირდება. მიუხედავად მეთოფეების დიდი ინტერესისა, Guardian-ის ცნობით, პარიზული კლუბი ზაფხულში თბილისში დაბადებული ფეხბურთელის თაობაზე არანაირი წინადადების განხილვას არ აპირებს.