კვერნაძის წარმატებული სეზონი და მსგავსება კვარაცხელისთან

ფროზინონეს ხელმძღვანელობა გიორგი კვერნაძის შენარჩუნებასა და მისი კონტრაქტის პირობების გაუმჯობესებაზე აქტიურად მუშაობს.

კლუბის სპორტულმა დირექტორმა, რენცო კასტანინიმ დაადასტურა, რომ მხარეებს შორის ახალ ხელშეკრულებაზე მოლაპარაკებები უკვე დაწყებულია.

მართალია, ქართველ შემტევს კლუბთან კონტრაქტი 2028 წლამდე აკავშირებს, თუმცა იტალიელებისთვის მთავარ საფრთხეს გამოსასყიდი პუნქტი წარმოადგენს. მომავალი წლის ივნისში ეს მუხლი ამოქმედდება, რაც იმას ნიშნავს, რომ ნებისმიერ მსურველს შეეძლება კვერნაძის სულ რაღაც 4 მილიონ ევროდ წაყვანა. ფროზინონეს კი მისი გაყიდვა მომავალში მინიმუმ 20 მილიონად სურს. ამიტომ, ახალი კონტრაქტის გაფორმება და გამოსასყიდი ფასის გაზრდა მათთვის პრიორიტეტულია. სანაცვლოდ, კლუბი მზადაა გიორგის ამჟამინდელი ანაზღაურება (200 000 ევრო წელიწადში), რაც სერია A-ს დონისთვის საკმაოდ დაბალია, საგრძნობლად გაზარდოს.

ჯერჯერობით უცნობია, დათანხმდება თუ არა თავად ფეხბურთელი ამ პირობებს, თუმცა კასტანინი ოპტიმისტურადაა განწყობილი და მას ხვიჩა კვარაცხელიასაც ადარებს:

მოლაპარაკებების პროცესში ვართ. კონტრაქტის განახლებისას მსგავსი დეტალების შეთანხმებას დრო სჭირდება, მაგრამ მჯერა, რომ ყველაფერს მოვაგვარებთ. მას ბრწყინვალე მომავლის პოტენციალი აქვს და ფიზიკურად საუკეთესო დონეზეა. ვინმეს რომ უნდა შევადარო, თამამად დავასახელებდი კვარაცხელიას, მიუხედავად იმისა, რომ ეს ძალიან ხმამაღალი შედარებაა

გიორგი კვერნაძე მიმდინარე სეზონში მართლაც შთამბეჭდავად გამოიყურება. იტალიის ჩემპიონატსა და თასზე ჩატარებულ 12 მატჩში მის ანგარიშზე 5 გოლი და 5 შედეგიანი გადაცემაა (უშუალოდ სერია A-ს 11 თამაშში 3 გოლი, 4 ასისტი და 1 მოპოვებული პენალტი აქვს). ასეთი სტატისტიკის ფონზე გასაკვირი არ არის, რომ ქართველით უკვე ინტერესდებიან ისეთი კლუბები, როგორებიც არიან რომა, ნაპოლი, ევერტონი, კრისტალ პალასი და მონაკო.