ლა ლიგა საქმეს მას შემდეგ იძიებს, რაც ესპანიოლის მცველმა ომარ ელ ჰილალიმ განაცხადა, რომ მას ელჩეს თავდამსხმელმა რაფა მირმა კვირას გამართულ შეხვედრაში რასისტული შეურაცხყოფა მიაყენა.
ესპანიოლის მცველმა მსაჯ იოსუ გალეჩ აპესტეგიას შეატყობინა, რომ მას რასისტულად შეურაცხყოფდნენ, რის შემდეგაც მსაჯმა „არა რასიზმს“ ჟესტი აჩვენა დახელები X-ის ფორმით გადაჯვარედინა.
ეს ჟესტი იწყებს სამსაფეხურიან პროტოკოლს, რაც მატჩის შეჩერებას გულისხმობს. საჭიროების შემთხვევაში, თამაში შეიძლება შეჩერდეს ან საერთოდ გაუქმდეს, თუ შეურაცხყოფა გაგრძელდება.
მსაჯის ანგარიშის მიხედვით, ელ ჰილალიმ, რომელიც ესპანეთში მაროკოელი მშობლების ოჯახში დაიბადა და მაროკოს ეროვნულ ნაკრებში თამაშობს, განაცხადა, რომ მირმა მის მიმართ ანტიიმიგრაციული შეურაცხმყოფელი ფრაზა გამოიყენა.
გალეჩ აპესტეგიას ანგარიშში წერია: „78-ე წუთზე, ესპანიოლის ფეხბურთელმა ომარ ელ ჰილალიმ მითხრა, რომ რაფა მირი მას მიუახლოვდა და უთხრა: ‘შენ აქ პატარა ნავით მოხვედი’“.
მსაჯმა ასევე დაამატა, რომ სავარაუდო შეურაცხყოფა მსაჯთა გუნდს არ გაუგონია, რის გამოც მოედანზე დაუყოვნებელი ზომების მიღება ვერ მოხერხდა.
მატჩი დაახლოებით სამი წუთით შეჩერდა, რის შემდეგაც თამაში განახლდა. 90-ე წუთზე მირმა პენალტით გაათანაბრა ანგარიში.
მატჩის მიმდინარეობისას ესპანიოლმა სოციალურ ქსელში ელ ჰილალის მხარდაჭერის პოსტი გამოაქვეყნა. მატჩის დასრულების შემდეგ კი ლა ლიგამ თავის X ანგარიშზე ანტირასისტული განცხადება გაავრცელა და ნებისმიერი რასისტული ქმედება დაგმო.
