კატალონიური Sport-ი პოლონურ წყაროებზე დაყრდნობით წერს, რომ რობერტ ლევანდოვსკის მსურველ კლუბთა სიას მადრიდის ატლეტიკოც შეემატა.
პოლონელი ჟურნალისტის, მატეუშ შვეჩიცკის თქმით, დიეგო სიმეონე ლევანდოვსკის გარშემო მიმდინარე პროცესებს ყურადღებით აკვირდება, რაც ზაფხულში მისი თავისუფალი აგენტის სტატუსით დამატების ალბათობას აჩენს.
გავიხსენოთ 2020 წლის ამბავი, როცა ბარსამ ლუის სუარესი გაუშვა. ურუგვაელს დიეგო სიმეონემ დაუძახა - ლა ლიგაში 21 გოლი და 3 ასისტი ჰქონდა, რაც ატლეტიკოს ჩემპიონობაში უმნიშვნელოვანესი წვლილი იყო. როხიბლანკოში მასზე მეტი არავის გაუტანია და არც საგოლე მოქმედება ჰქონია.
ამჟამინდელი მოცემულობით, ლევანდოვსკი მზადაა, ბარსაში სტატუსი, სათამაშო დრო და ხელფასი შეიმციროს და უპირატესობას კამპ ნოუზე დარჩენას ანიჭებს. ეს იმ ფონზე, როცა მისით მილანი, უკვე ატლეტიკო და აზიური კლუბები ინტერესდებიან.
თავის მხრივ, ბარსელონას პოზიციის შესახებ, კატალონიური გამოცემები ბოლო დროს წერენ, რომ კლუბს ვეტერანი თავდამსხმელის გაშვება ურჩევნია, რის მიზეზადაც ორი მთავარი ფაქტორია - გახშირებული ტრავმიანობა და სახელფასო ჭერის საგრძნობლად შემცირება. პოლონელი ბლაუგრასგან წლიურად 20 მლნ ევროზე ოდნავ მეტს იღებს.
ცნობისთვის, რობერტმა სანაკრებო პაუზისას ბარძაყის კუნთის ტრავმა მიიღო და 3-4 კვირა ვერ ითამაშებს, რაც ნიშნავს, რომ სეზონის პირველ ელ კლასიკოსაც გამოტოვებს. პოლონელს ლა ლიგის წლევანდელ 7 მატჩში 4 გოლი აქვს გატანილი, ჩემპიონთა ლიგის ორ ტურში კი ჯერ არ გაუტანია.
