ლაშა შავდათუაშვილმა წარსული წლები გაიხსენა და -73 კგ წონით კატეგორიაში ევროპის ჩემპიონობა მოიპოვა.
ქართველმა საკუთარ ქვეყანაში გამართულ მძიმე ფინალში აზერბაიჯანელ ჰიდაიათ ჰეიდაროვს აჯობა. დაპირისპირება ორი სხვადასხვა თაობის ოლიმპიურ ჩემპიონს შორის გაიმართა.
34 წლის შავდათუაშვილი თავისი ეპოქის ერთ-ერთი ყველაზე ტიტულოვანი ძიუდოისტია - მას აქვს ოლიმპიური ოქრო (2012), ვერცხლი (2020) და ბრინჯაო (2016), მსოფლიო ჩემპიონობა (2021), ასევე ევროპის ჩემპიონობა 2013 წელს, რაც 13-წლიან შუალედს ნიშნავს.
მის წინააღმდეგ იდგა ჰეიდაროვი - მოქმედი ოლიმპიური და მსოფლიო ჩემპიონი, ოთხგზის ევროპის ჩემპიონი და ბოლო წლებში ამ წონის ერთ-ერთი დომინანტი ძალა.
შეხვედრის დასაწყისი ფრთხილი, თუმცა ძალიან დაძაბული იყო - ორივე სპორტსმენი პატივს სცემდა ერთმანეთის ძლიერ მხარეებს. შავდათუაშვილი ცდილობდა ჭიდაობის კონტროლსა და ტემპის მართვას, ხოლო ჰეიდაროვი ეყრდნობოდა სწრაფ რეაქციებსა და კონტრშეტევებს. რამდენიმე მცდელობის მიუხედავად, ძირითად დროში ქულა ვერავინ აიღო.
დაინიშნა „გოლდენ სქორი“, სადაც ბრძოლა ტაქტიკურ და ფიზიკურ დაპირისპირებად გადაიქცა. აზერბაიჯანელი იძულებული გახდა თავდაცვაში გადასულიყო და ამ ზეწოლის შედეგად შიდოები დაუგროვდა.
„გოლდენ სქორის“ მეხუთე წუთზე გადამწყვეტი მომენტი დადგა. ჰეიდაროვმა ვერ შეძლო ეფექტური შეტევის განხორციელება და პასიურობისთვის მესამე შიდო მიიღო. ბრძოლა ჰანსოკუ-მაკეთი დასრულდა და გამარჯვება ქართველ ვეტერანს დარჩა.
ორ ტიტულს შორის 13-წლიანი სხვაობა ერთ-ერთი ყველაზე დიდია ისტორიაში - კლაუს გლანმა ევროპის ჩემპიონობა 1968 და 1980 წლებში მოიპოვა (12-წლიანი სხვაობით).
თბილისში გამართული ჩემპიონატის მეორე დღეს საქართველომ ეროვნული ჰიმნი ორჯერ მოისმინა.
ეთერ ლიპარტელიანი - პირველი ქართველი ქალი ევროპის ჩემპიონი ძიუდოში
