ლეაუ ისევ ვერ ითამაშებს, მზად არაა ნკუნკუც - მილანს შეტევაში პრობლემები ბოლონიასთანაც ექნება

მილანის ლიდერი, რაფაელ ლეაუ, ვერც ბოლონიასთან კვირას გასამართ მატჩში ითამაშებს. ძირითადში სათამაშოდ მზად არაა როსონერის ახალწვეული კრისტოფერ ნკუნკუ.

ლომბარდიელთა სტაფი იმედოვნებდა, რომ პორტუგალიელი სანაკრებო პაუზის დროს ფეხის უკანა კუნთის დაზიანებას მოირჩენდა, მაგრამ, როგორც Calciomercato წერს, კვლავ გუნდისგან განცალკევებულად ვარჯიშობს და ექიმები გარისკვას მიზანშეწონილად არ მიიჩნევენ.

რაც შეეხება ნკუნკუს, რომელიც სან სიროზე 36 მლნ ევროს სანაცვლოდ სატრანსფერო ფანჯრის ბოლო დღეებში გადავიდა, სათანადო ფიზიკურ ფორმაში არაა, რომ მატჩი ძირითადიდან დაიწყოს. პრესის ვარაუდით, სათადარიგოთა სკამზე იქნება და მცირე სათამაშო დროს მიიღებს.

ამ ყველაფრის ფონზე, მასიმილიანო ალეგრი შეტევაში ისევ მხოლოდ კრისტიან პულიშიჩისა და სანტიაგო ხიმენესის იმედზე შეიძლება იყოს - ორივე მათგანმა ნაკრებში ითამაშა, ორივემ ოკეანეს მიღმა და, წესით, საუკეთესო ფიზიკურ ფორმაში ვერც ისინი იქნებიან.

მილანმა სერია A-ს საწყის 2 ტურში 3 ქულა აიღო, მასსავით 3-ქულიან ბოლონიას კი 14 სექტემბერს, საკუთარ მოედანზე შეხვდება.