ლიონი ენდრიკის დაბრუნებას არ გამორიცხავს

ლიონის ტექნიკურმა დირექტორმა, მატიე ლუი-ჟანმა, RMC Sport-ის ეთერში განაცხადა, რომ კლუბი მზად არის 19 წლის ბრაზილიელი თავდამსხმელის, ენდრიკის დასაბრუნებლად კარი ღია დატოვოს.

ენდრიკი ფრანგულ კლუბს იანვარში, მადრიდის რეალიდან იჯარით შეუერთდა. მას სანტიაგო ბერნაბეუზე სათამაშო დრო აკლდა, მსოფლიო ჩემპიონატზე გამგზავრება კი მისი უმთავრესი მიზანი იყო.

ლიონმა ტრანსფერზე მუშაობა სატრანსფერო ფანჯრის გახსნამდე ადრე დაიწყო და კონკურენტებს აჯობა. ბრაზილიელმა სეზონის მეორე ნახევარში ფრანგულ გუნდში ბრწყინვალედ იასპარეზა - 21 მატჩში 8 გოლი და 8 საგოლე გადაცემა მიითვალა, ამასთანავე, პროფესიონალურ კარიერაში პირველი ჰეთ-თრიქიც შეასრულა.

ამ ფანტასტიკურმა ფორმამ მას ბრაზილიის ნაკრებში ადგილი დაუმკვიდრა. მიუხედავად იმისა, რომ ფეხბურთელს მომავალ სეზონში რეალში დამკვიდრება სურს და ახალი იჯარა ამ ეტაპზე არ იგეგმება, ლიონის დირექტორმა სამომავლო პერსპექტივაზე მაინც ისაუბრა:

კიდევ ერთი იჯარა? ამ წამს ვიტყოდი, რომ არა, შეუძლებელია. მაგრამ... ენდრიკი ხშირად საუბრობს ღმერთზე. ასე რომ, ვნახოთ. ის შესანიშნავი ბიჭია.