ლივერპული უდანაკარგოა - ენფილდზე რევანში შედგა

უეფას ჩემპიონთა ლიგის მე-5 ტურის ცენტრალურ მატჩში ლივერპულმა ენფილდზე მადრიდის რეალი მიიღო.

პირველი ტაიმი უგოლოდ დასრულდა, თუმცა ყვითელი ბარათები მრავლად იყო. მსაჯს 4-ჯერ მოუწია მოთამაშეების გაფრთხილება.

მეორე ტაიმში თამაში უფრო გაიხსნა და ლივერპულმა გოლი მოამწიფა, 52-ე წუთზე კი ალექსის მაკ ალისტერმა ტიობო კურტუას კარი აიღო და ანგარიში გახსნა.

61-ე წუთზე რეალს წონასწორობის აღდგენის საშუალება მიეცა, შეცვლაზე შემოსული ლუკას ვასკესი საჯარიმოში ენდი რობერტსონმა წააქცია, პენალტის დასარტყმელად კილიან მბაპე მივიდა, თუმცა ფრანგის დარტყმული კელეჰერმა მოიგერია.

70-ე წუთზე პენალტი მეორე მხარეს დაიდო. საჯარიმოში ფერლან მენდიმ მოჰამედ სალაჰის წინააღმდეგ დაარღვია თამაშის წესები. ეგვიპტელი თავად მივიდა დასარტყმელად, თუმცა თავისი შანსი მანაც ვერ გამოიყენა. სალაჰმა ბურთი ძელს მოარტყა.

საბოლოოდ 77-ე წუთზე ლივერპულმა სხვაობა ორამდე მაინც გაზარდა. ენდი რობერტსონის საჯარიმოში ჩაწოდების შემდეგ თავური დარტყმით კოდი გაკპომ შეარხია მადრიდელთა კარის ბადე და საბოლოო ანგარიშიც დააფიქსირა (2-0).

მერსისაიდელებმა სამეფო კლუბთან 8-მატჩიანი მოუგებელი სერია დაასრულეს და 15 წლის შემდეგ პირველად დაამარცხეს რეალი.

არნე სლოტის გუნდი ჩემპიონთა ლიგაზე 5 ტურის შემდეგ ერთადერთი გუნდია, რომელმაც ყველა მატჩი მოიგო და უდანაკარგოდ, 15 ქულით ცხრილის სათავეშია.

ანჩელოტის შეგირდებმა კი 5 თამაშიდან 3 წააგეს და მხოლოდ 6 ქულა აქვთ. რეალი ცხრილში 24-ე ადგილზეა და საპლეიოფო ზონას ხურავს.