27 და 30 ნოემბერს საქართველოს საკალათბურთო ნაკრებს 2027 წლის მსოფლიო ჩემპიონატის შესარჩევ ტურნირში 2 მატჩი ელის. 27-ში ეროვნული გუნდი თბილისში უკრაინას დაუპირისპირდება, 30-ში კი ესპანეთს ესტუმრება.
გარდა იმისა, რომ ეს შეხვედრები მსოფლიო ჩემპიონატის გზაზე ძალიან მნიშვნელოვანია, მათ კიდევ ერთი ემოციური დატვირთვა აქვს.
27-ში გიორგი შერმადინი საქართველოში თავის ბოლო სანაკრებო მატჩს ჩაატარებს და ქართველ გულშემატკივრებს დაემშვიდობება, 30-ში კი იქ სადაც საკლუბო ლეგენდად იქცა, ანუ ტენერიფეში უკვე სანაკრებო კარიერას ოფიციალურად დაასრულებს.
შერმადინის დებიუტი საქართველოს ეროვნულ გუნდში 2006 წლის 3 სექტემბერს ლუქსემბურგის წინააღმდეგ შედგა. გიორგი მაშინ 17 წლის იყო და ალბათ ვერ წარმოიდგენდა, რომ ქართული კალათბურთის ისტორიაში ერთ-ერთი გამორჩეული ლეგენდა გახდებოდა.
შერმადინისა და საქართველოს ნაკრების გზა ამ 19 წლის განმავლობაში განუყოფელი იყო, რადგან ამ თავგადასავლის განმავლობაში გიორგი ყოველთვის მზად იყო ნაკრებს დახმარებოდა.
ჯერ იყო B დივიზიონი, შემდეგ A დივიზიონში აღზევება და პირველ ევრობასკეტზე გასვლა, ამას ჯამში 6 ევრობასკეტი მოჰყვა და იყო ისტორიულ პირველ მსოფლიო ჩემპიონატზე მოხვედრაც, გიორგი შერმადინი კი ყოველთვის გუნდის სტაბილური წევრი გახლდათ და ერთადერთია, რომელმაც ზემოთ ჩამოთვლილ ყველა ტურნირზე მოახერხა თამაში.
2023 მსოფლიო ჩემპიონატი - 8.2 ქულა, 4.2 მოხსნა, ეფექტურობა 11.2
შერმადინის საუკეთესო მიღწევა საქართველოს ნაკრებთან ერთად ბოლო ევრობასკეტზე დაფიქსირდა, როცა გუნდმა ესპანეთისა და საფრანგეთის დამარცხების შემდეგ 1/4 ფინალში გააღწია და საუკეთესო 8 გუნდში მოხვდა.
ისტორიულ პირველ მსოფლიო ჩემპიონატზე კი საქართველომ პირველი ჯგუფური ეტაპი დაძლია და საუკეთესო 16 გუნდში გაინაღდა ადგილი.
ამ 19 წლის განმავლობაში შერმოს ნაკრებში ბევრი დასამახსოვრებელი მომენტი დაუგროვდა, თუმცა ერთ-ერთი გამორჩეული, რომელზეც თავადაც საუბრობს 2019 წლის მსოფლიო ჩემპიონატის საკვალიფიკაციო ეტაპზე, თბილისში ისრაელის ნაკრებთან ბოლო წამზე ჩაგდებული თამაშის მომგები ორქულიანია.
გიორგის ბევრი კარგი მატჩის გახსენება შეიძლება, თუმცა ყველას გამორჩევა შორს წაგვიყვანს. მაგალითისთვის კი ერთ-ერთი ასეთი უკვე 2023 წლის მსოფლიო ჩემპიონატის საკვალიფიკაციო ეტაპზე ჩრდილოეთ მაკედონიასთან დაფიქსირებული ორმაგი დუბლია - 20 ქულა, 15 მოხსნა.
საბოლოოდ შეგვიძლია ვთქვათ, რომ შერმადინის 19-წლიანი სანაკრებო კარიერა არა მხოლოდ ქართული კალათბურთის ისტორიაშია გამორჩეული. გიორგი არის კალათბურთელი, რომელიც ეროვნული გუნდის ყოველ ნაბიჯთან არის ასოცირებული და თამამად შეიძლება ითქვას, რომ მოთამაშე გიორგი შერმადინი და საქართველოს საკალათბურთო ნაკრები ერთად გაიზარდნენ - B დივიზიონიდან ევროპის საუკეთესო 8 გუნდამდე.
2006 წელს, როცა ნაკრებში მისი დებიუტი შედგა, ის თბილისის მაკაბის 17 წლის მოთამაშე იყო, ახლა კი 36 წლის ასაკში ის ეროვნულ გუნდს ლეგენდის სტატუსით ტოვებს, რომელსაც უდიდესი საკლუბო კარიერაც უმაგრებს ზურგს, ის ხომ ევროპაში საუკეთესო ჩემპიონატის (ლიგა ენდესა) რეკორდსმენი და ერთ-ერთი გამორჩეული ცენტრია.
ბევრი რომ აღარ გავაგრძელოთ, ბოლოს ერთი რამის თქმა არ უნდა დაგვავიწყდეს...
