მაიკლ ბისპინგმა ტომ ასპინალი გააკრიტიკა

UFC-ის ლეგენდამ, მაიკლ ბისპინგმა გასულ კვირას თავისი კრიტიკული განცხადებით მებრძოლები და გულშემატკივრები გააოცა.

საკუთარ პოდკასტში მან ეჭვქვეშ დააყენა მძიმე წონის ჩემპიონის, ტომ ასპინალის თვალის ტრავმის სერიოზულობა, რის გამოც ბრიტანელი მოკრივე ოქტაგონს გასული წლის ოქტომბრიდან ჩამოშორდა. ბისპინგის ეს სიტყვები უცნაური იყო, რადგან თავად ბრძოლების დროს ცალ თვალში სინათლე დაკარგა და წესით, ასეთი ტრავმების მიმართ მეტი სიფრთხილე მართებდა.

UFC-ის გავლენა და კომპანიის ინტერესები

ტომ ასპინალის მეგობარმა და სპარინგ-პარტნიორმა, KSW-ის მძიმე წონის ჩემპიონმა ფილ დე ფრისმა ბისპინგის პოზიციას „საშინელი სიტუაცია“ უწოდა. მისი თქმით, ასპინალს თვალზე ოპერაცია დასჭირდა და ტრავმის სიმულაციაზე ლაპარაკი სისულელეა. დე ფრისი მიიჩნევს, რომ ბისპინგმა ეს განცხადება მხოლოდ თავისი დამსაქმებლის, UFC-ის საამებლად გააკეთა.

„ბისპინგი კარგი ტიპია, მაგრამ ის კომპანიის კაცია. თუ UFC-დან ეტყვიან, რომ ტომზე ბრძოლის მისაღებად წნეხი განახორციელოს, ის ზუსტად ამას გააკეთებს. ფანები ძალიან ცვალებადები არიან, გუშინ ყველას უყვარდა ტომი, დღეს კი, როცა სერილ განთან ორთაბრძოლაში თვალის ტრავმა მიიღო და ჩხუბის შეწყვეტა მოუწია, კრიტიკა დაუწყეს. თუმცა, ასპინალს სქელი კანი აქვს და ამ წნეხს გაუძლებს“, - განაცხადა დე ფრისმა Bloody Elbow-სთან ექსკლუზიურ ინტერვიუში.

დე ფრისის მომავალი გეგმები

ფილ დე ფრისმა KSW-ის საჩემპიონო ქამარი მეთოთხმეტედ მიმდინარე წლის აპრილში, მარჩინ ვოიჩიკის დამარცხებით დაიცვა. ორგანიზაციის ყველაზე დომინანტი მძიმეწონოსანი ოქტაგონზე დაბრუნებას 2026 წლის ბოლოს გეგმავს და მას სრულიად უჩვეულო მეტოქის გამოწვევა სურს.

ბრიტანელი მებრძოლის მიზანი ძალოსან ედი ჰოლთან ორთაბრძოლაა, რომელიც უქმეებზე კრივის მატჩში ტომი ფიურის უპირისპირდება. დე ფრისი დარწმუნებულია, რომ ჰოლი პროფესიონალ მოკრივესთან სასტიკად დამარცხდება, რის შემდეგაც მას ოფიციალურად გამოიწვევს და თავის სპორტში ეცდება ძალების გაზომვას.