მანჩესტერ სიტიმ გამოცდილი მეკარის ტრანსფერი დაადასტურა

მანჩესტერ სიტიმ ხერონიმო რულის ტრანსფერი დაადასტურა.

დიდი გამოცდილების მქონე მეკარე ეტიჰადზე ფრანგული მარსელიდან გადავიდა და კლუბთან ორწლიანი კონტრაქტი გააფორმა, რომელიც 2028 წლის ზაფხულამდე იმოქმედებს.

არგენტინელი მეკარისთვის ეს მანჩესტერ სიტიში მეორე პერიოდია. რული კლუბში 2016/17 წლების სეზონშიც ირიცხებოდა, თუმცა პირველი გუნდის შემადგენლობაში არცერთი მატჩი არ ჩაუტარებია.

საერთაშორისო დონეზე რულის არგენტინის ნაკრებში 8 მატჩი აქვს ჩატარებული. ის იმ გუნდის შემადგენლობაშიც იყო, რომელმაც 2022 წლის მსოფლიო ჩემპიონატი და 2024 წლის კოპა ამერიკა მოიგო.

რაც შეეხება საკლუბო კარიერას, მან მშობლიურ არგენტინაში ესტუდიანტესის ღირსება დაიცვა, შემდეგ კი ევროპაში არაერთ კლუბში ითამაშა, მათ შორის სოსიედადში, ვილიარეალში, აიაქსში, მონპელიესა და მარსელში.

ვილიარეალში ყოფნის პერიოდში რული ესპანურ კლუბს 2020/21 წლების ევროპა ლიგის მოგებაში დაეხმარა, ფინალში ვილიარეალმა მანჩესტერ იუნაიტედი დაამარცხა.

სიტიში ტრანსფერის შემდეგ რულიმ განაცხადა, რომ ენცო მარესკას გუნდში გადასვლით ძალიან ბედნიერი და აღფრთოვანებულია.

ინგლისურმა კლუბმა არგენტინელი მეკარის კონტრაქტის დარჩენილი ერთი წლის გამოსასყიდად 3.5 მილიონი ევრო გადაიხადა.