მარსელში დე ძერბის მომავალი საფრთხეშია

ბრიუგეში მძიმე მარცხისა და ჩემპიონთა ლიგიდან გამოვარდნის შემდეგ, რობერტო დე ძერბის პოზიცია მარსელის მთავარი მწვრთნელის პოსტზე სერიოზულად შეირყა.

ფრანგული RMC Sport-ის ცნობით, იტალიელი სპეციალისტის შესაძლო წასვლის თაობაზე მოლაპარაკებები მხარეებს შორის უკვე მიმდინარეობს.

გუნდი ამჟამად ლიგა 1-ის მე-20 ტურის მატჩისთვის ემზადება, რომელიც პარიზის წინააღმდეგ ჩატარდება. დე ძერბისა და კლუბის ხელმძღვანელობას შორის დისკუსიები მიმდინარეობს. შესაბამისად, არ არის გამორიცხული, რომ მან მარსელი უახლოეს მომავალში დატოვოს, თუმცა კლუბთან დაახლოებული წყაროების თქმით, საბოლოო გადაწყვეტილება ჯერ მიღებული არ არის.

რობერტო დე ძერბიმ ბრიუგესთან მარცხის შემდეგ, ხუთშაბათს, კლერფონტენში მდებარე მიშელ პლატინის სახელობის საწვრთნელ ბაზაზე მარსელის ვარჯიში არ ჩაატარა. კლუბთან დაახლოებული წყაროები განმარტავენ, რომ ეს წინასწარ იყო დაგეგმილი და სესიას სამწვრთნელო შტაბი უძღვებოდა.

RMC-სთან საუბარში სპორტულმა დირექტორმა მედჰი ბენატიამ მკაცრი განცხადებები გააკეთა, თუმცა, როგორც ჩანს, რობერტო დე ძერბი დაინდო და პასუხისმგებლობა ფეხბურთელებს დააკისრა:

„ვიმედოვნებ, ფეხბურთელები გააცნობიერებენ, რომ ეს პროფესიონალური შეცდომა იყო. კარიერის განმავლობაში ბევრი მატჩი წამიგია, მაგრამ იშვიათად განმიცდია ასეთი სირცხვილი, ორ თამაშში გაშვებული ექვსი გოლი.“

მან ასევე დაამატა: „მინდა, ამას სეზონის დარჩენილ ნაწილზე გავლენა ჰქონდეს.“

რობერტო დე ძერბის მომავალი მარსელში ბეწვზე ჰკიდია, მიუხედავად იმისა, რომ არსებობს ვარაუდი, შესაძლოა მან დროებით განზე გადგომის აუცილებლობა იგრძნოს, სანამ საკუთარ მომავალზე საბოლოო გადაწყვეტილებას მიიღებს.

მსგავსი რამ გასულ სეზონში, რეიმსთან მარცხის შემდეგაც მოხდა, როდესაც მან გარკვეული დროით გუნდისგან დისტანცია დაიჭირა.