ლე კლასიკი - კვარაცხელია მარსელთან მატჩის განაცხადშია

ლიგა 1-ის 21-ე ტურის ცენტრალურ მატჩში ფრანგული კლასიკა გაიმართება, სადაც პარი სენ-ჟერმენი პარკ დე პრენსზე მარსელს მიიღებს.

პარიზელთა სამატჩო განაცხადში მოხვდა ხვიჩა კვარაცხელია, რომელიც ჩემპიონთა ლიგაზე ნიუკასლთან შეხვედრაში მიღებული კოჭის ტრავმის შემდეგ მოედანს უბრუნდება.

პსჟ ამ მომენტისთვის სატურნირო ცხრილში მე-2 ადგილზე იმყოფება და ლიდერ ლანსს, რომელმაც ამ ტურში რენი 3-1 დაამარცხა, 1 ქულით ჩამორჩება. მარსელი კი 39 ქულით მე-4 ადგილზე იმყოფება და მესამეადგილოსან ლიონთან, რომელმაც ნანტს სტუმრად 0-1 მოუგო, 3 ქულა აშორებს.

ლიგა 1-ის ბომბარდირთა დავას 13 გოლით მარსელის ინგლისელი შემტევი, მეისონ გრინვუდი ლიდერობს, პარიზელთა მხრიდან კი ამ სეზონში ყველაზე მეტი გოლი ბრედლი ბარკოლას აქვს გატანილი, რომლის ანგარიშზეც 7 გოლია.

ხვიჩა კვარაცხელიას ანგარიშზე ლიგა 1-ის მიმდინარე სეზონში 3 გოლი და 3 საგოლე გადაცემაა.

გუნდებს შორის პირველი წრის მატჩი მე-5 ტურში გაიმართა, სადაც მასპინძელმა ოლიმპიკმა პსჟ მარკინიოსის ავტო-გოლით 1-0 დაამარცხა. გუნდები ერთმანეთს საფრანგეთის სუპერ თასის ფინალშიც შეხვდნენ, სადაც პარიზელებმა პენალტების სერიაში იმარჯვეს და მორიგი ტიტული მოიპოვეს.

დღევანდელი მატჩი 23:45 საათზე დაიწყება.