"მარტოსული მებრძოლი" - რა პირობებში ითამაშა ბოლქვაძემ მსოფლიოს მე-3 ჩოგანთან?

მარიამ ბოლქვაძემ 2026 წლის US Open-ის საკვალიფიკაციო ეტაპი გამარჯვებით დაიწყო და ძირითად ბადეში მოსახვედრად ბრძოლას აგრძელებს.

28 წლის ქართველმა ჩოგბურთელმა დიდი სლემის ტურნირზე კარიერაში პირველად 2019 წელს, სწორედ US Open-ზე ითამაშა, როცა საკვალიფიკაციო ეტაპზე 3 შეხვედრა მოიგო, ძირითად ბადეში ამერიკელ ბერნარდა პერასაც აჯობა და მსოფლიოს მე-3 ჩოგან კაროლინა პლიშკოვას დაუპირისპირდა.

ცხადია, შეხვედრის გარშემო დიდი ყურადღება იყო, რადგან პლიშკოვა მსოფლიოს ერთ-ერთი საუკეთესო ჩოგბურთელი და იმ ტურნირის ერთ-ერთი ფავორიტი გახლდათ.

პრესაშიც არაერთი სტატია დაიწერა და ერთ-ერთი ეხებოდა იმას, რა პირობებში მოუწია მაშინ 21 წლის უცნობ ქართველ გოგონას ვარსკვლავ მეტოქესთან US Open-ის მთავარ კორტ არტურ ეშზე შეხვედრა.

"მარიამ ბოლქვაძემ, რომელმაც კარიერაში პირველად გაიარა დიდი სლემის საკვალიფიკაციო ეტაპი და პირველი წრეც მოიგო, ნიუ-იორკში სრულიად მარტო იმყოფება.

მას არ ახლავს არც მწვრთნელი, არც ოჯახის წევრები და არც გუნდის სხვა წარმომადგენელი. 21 წლის გოგონა მსოფლიოს მე-3 ჩოგანს, კაროლინა პლიშკოვას, გიგანტურ არტურ ეშის სტადიონზე მარტო დაუპირისპირდა და პრესკონფერენციებზეც ამაყად ამბობდა, რომ ეს ფაქტი მას საერთოდ არ აშინებდა", - წერდა ამერიკული პრესა.

ბათუმში დაბადებულმა და ბოლო ათწლეულზე მეტი ლონდონში მცხოვრებმა ჩოგბურთელმა პლიშკოვასთან 1:6; 4:6 წააგო და მისთვის ისტორიული ტურნირი მეორე წრეში დაასრულა.