მასპინძლის შთამბეჭდავი დასაწყისი - გერმანიამ შოტლანდია გაანადგურა

ევროპის ჩემპიონატის გახსნით მატჩში მასპინძელმა გერმანიამ შოტლანდიის ნაკრებს გადაუარა.

შეხვედრა მიუნხენში, ალიანც არენაზე გაიმართა და ბუნდესნაკრების გამარჯვებით 5:1 დასრულდა.

მოედანზე გერმანელების სრული დომინაცია ვიხილეთ - შოტლანდიელებმა მატჩი კარში ზუსტი დარტყმის გარეშე დაასრულეს, ერთადერთი გოლი კი ანტონიო რუდიგერმა საკუთარ კარში ჩაჭრა.

პირველი ტაიმი გერმანელებმა 3:0 ვირცის (10'), მუსიალას (19') და ჰავერცის (45+1 პენ') გოლებით მოიგეს. 44-ე წუთზე უხეშობისთვის სკოტების მცველი პორტეუსი გააძევეს.

შესვენების შემდეგ გერმანელებმა დომინირება განაგრძეს და თავის გამოჩენა შეცვლაზე შემოსულმა ნიკლას ფულკრუგმა გამოიჩინა. შემდეგ რუდიგერმა ბურთი საკუთარ კარში ჩაჭრა, წერტილი კი ბოლო წამებზე ემრე ჯანმა დასვა, რომელიც ევროზე გამოძახებული საერთოდ არ იყო, თუმცა განაცხადში პავლოვიჩის ტრავმის გამო მოხვდა.

ამ გამარჯვებით გერმანიამ პირველი სამი ქულა დამაჯერებელ სტილში მოიპოვა.