ლა ლიგის პრეზიდენტი ხავიერ ტებასი კილიან მბაპეს სკანდალთან დაკავშირებით ჩინეთის ელჩს შეხვდა.
,,დღეს ესპანეთში ჩინეთის ელჩთან შეხვედრა გავმართე, რათა განგვეხილა კილიან მბაპეს განცხადებებით შექმნილი ვითარება და მოგვეძებნა გამოსავალი, რომელიც ამ ინციდენტის დაძლევის საშუალებას მოგვცემს.
ბოლო რამდენიმე წლის განმავლობაში ლა ლიგა მჭიდროდ თანამშრომლობდა ჩინეთის ხელისუფლებასთან, საფეხბურთო ორგანიზაციებთან, მაუწყებლებთან და ადგილობრივ კომპანიებთან.
ჩვენი მიზანი იყო არა მხოლოდ ჩინეთში ესპანური ფეხბურთის პოპულარობისა და განვითარების ხელშეწყობა, არამედ თავად ჩინური ფეხბურთის განვითარებაში წვლილის შეტანაც, ჩვენი გამოცდილების, ცოდნისა და რესურსების გაზიარების გზით.
გვსურს, რომ ჩვენი თანამშრომლობის შეთანხმებები, განსაკუთრებით ჩინეთის პროფესიულ საფეხბურთო ლიგასთან (CFL) გაფორმებული სტრატეგიული შეთანხმება, რომელიც 2029 წლამდე მოქმედებს, ასევე China Media Group-თან (CMG) მიღწეული შეთანხმებები და სხვა ერთობლივი პროექტები, კვლავ წარმატებით გაგრძელდეს.
ჩვენი მიზანია, ხელი შევუწყოთ ჩინური ფეხბურთის კიდევ უფრო განვითარებას და ჩვენი ჩემპიონატები მილიონობით გულშემატკივრისთვის უფრო ხელმისაწვდომი გავხადოთ.
ეს ურთიერთობა ურთიერთპატივისცემაზე, ნდობასა და თანამშრომლობაზეა დაფუძნებული. ჩვენ ვალდებულნი ვართ, შევინარჩუნოთ და კიდევ უფრო განვამტკიცოთ ეს კავშირები.
ჩვენი მიზანია, გავაგრძელოთ ერთობლივი მუშაობა, რათა ერთმა კონკრეტულმა ინციდენტმა ზიანი არ მიაყენოს აქამდე მიღწეულ მნიშვნელოვან პროგრესს და უარყოფითად არ იმოქმედოს მილიონობით ჩინელ გულშემატკივარზე, რომლებიც ჩვენს ჩემპიონატებს ადევნებენ თვალს.
ჩინეთი ლა ლიგისთვის სტრატეგიული პარტნიორია და მომავალშიც ასეთად დარჩება." - წერს ტებასი სოციალურ ქსელში.
ფრანგმა ვარსკვლავმა ჩინეთის სახალხო რესპუბლიკის დამფუძნებელ მაო ძედუნზე იხუმრა, რასაც ჩინეთის მთავრობისა და კომპანიების რეაქცია მოჰყვა.
მბაპეს ბოდიში და ჩინური ტელევიზიის რადიკალური გადაწყვეტილება
