ევროპის ჩემპიონატის საკვალიფიკაციო ეტაპის B ლიგაში მოასპარეზე საქართველოს 19-წლამდე გოგონათა ნაკრებისთვის მეორე ტური საკმაოდ მძიმე გამოდგა.
ლავრენტი დავითაშვილის გუნდი ირლანდიის რესპუბლიკის ნაკრებს დაუპირისპირდა და სამწუხაროდ, დიდი ანგარიშით, 0:7 დამარცხდა.
მატჩის ბედი ფაქტობრივად პირველივე ტაიმში გადაწყდა. მე-8 წუთზე ანა ბატლერმა ანგარიში გახსნა, რასაც 26-ე წუთზე ქეით ჯონსის გოლი მოჰყვა. მალევე ბატლერმა დუბლი გაიფორმა, ხოლო 36-ე წუთზე ელა კელიმ ტაიმის საბოლოო შედეგი დააფიქსირა - 0:4. თამაშის სურათი არც მეორე ნახევარში შეცვლილა. 49-ე და 90-ე წუთებზე ბრესლინმაც დუბლი შეასრულა, ხოლო 82-ე წუთზე საკუთარი გოლი დევოიმაც მიითვალა.
მიუხედავად ამ მძიმე შედეგისა, საქართველოს ნაკრებს ჯგუფში 3 ქულა მაინც აქვს, რადგან პირველ ტურში ჩვენმა გოგონებმა ბულგარეთი მინიმალური სხვაობით, 1:0 დაამარცხეს.
ახლა სრული კონცენტრაცია დასკვნით ტურზე გადადის, სადაც ქართველი ფეხბურთელები სომხეთს დაუპირისპირდებიან. ეს მნიშვნელოვანი მატჩი 13 ოქტომბერს, თბილისის დროით 14:00 საათზე აიღებს სტარტს.
