,,მეგობრები, რომლებმაც ოცნება აისრულეს" - ემოციური ისტორია მამუკელაშვილზე

სოციალურ ქსელში სანდრო მამუკელაშვილის შესახებ ემოციური ისტორია ვრცელდება.

,,გამარჯობა ყველას, მე ალესანდრო გუცონი ვარ და მინდა, ერთი ულამაზესი ისტორია მოგიყვეთ, რომელშიც მთავარი როლი მეგობრობამ და კალათბურთმა ითამაშა.

პირველ ფოტოზე მე და NBA-ის მოთამაშე სანდრო მამუკელაშვილი ვართ.

ჩვენ ჯერ კიდევ ბავშვობაში, 2014 წელს, ბიელაში გავიცანით ერთმანეთი, როდესაც ერთ გუნდში ვთამაშობდით. ის საქართველოდან ჩამოვიდა ოცნებით, გამხდარიყო კალათბურთელი. იტალიურად არ საუბრობდა, მაგრამ ჩვენ ყველანი „სანდროს“ ვეძახდით. ის ძალიან თბილი და გულწრფელი ბიჭი იყო, რომელთანაც შესანიშნავი მეგობრობა ჩამომიყალიბდა.

დღემდე მახსოვს მისი ცრემლები, როდესაც იტალიას ტოვებდა, რადგან აშშ-ში სათამაშოდ სტიპენდია მიიღო. დროთა განმავლობაში ერთმანეთთან კავშირი ცოტათი დავკარგეთ, ის კი NBA-ის მოთამაშე გახდა.

მე მისი ტალანტი არ მქონდა, სერია C-ში ვთამაშობდი, კალათბურთის პარალელურად კი ფოტოგრაფიისა და ვიდეოს მიმართ ჩემს გატაცებას ვავითარებდი. ვსწავლობდი, ექსპერიმენტებს ვატარებდი და საბოლოოდ ჩემი პატარა სააგენტო გავხსენი, რათა კალათბურთის სამყაროში მემუშავა.

გასულ წელს კვიპროსში, ევროპის საკალათბურთო ჩემპიონატზე აღმოვჩნდი, რადგან დანილო გალინარის საქმიანობას აქტიურად ვაშუქებდი.

სწორედ კვიპროსში, 10 წლის შემდეგ, სანდრო კვლავ ვნახე, ის იქ საქართველოს ეროვნულ ნაკრებთან ერთად იმყოფებოდა.

ეს ძალიან ემოციური შეხვედრა იყო. ორი მეგობარი, რომლებსაც წლების განმავლობაში ერთმანეთთან კავშირი დაკარგული ჰქონდათ, დიდხანს ვსაუბრობდით ისე, თითქოს საერთოდ არანაირი დრო არ გასულიყო.

ჩვენმა ძლიერმა მეგობრობამ იქამდე მიგვიყვანა, რომ სანდრომ შემომთავაზა, ტორონტოში გადავსულიყავი და თამაშების, ვარჯიშებისა და ინდივიდუალური მომზადების დროს მის ვიდეოებზე, ფოტოებზე, ვლოგებსა და სოციალური ქსელებისთვის განკუთვნილ კონტენტზე მეზრუნა. მე დავთანხმდი.

აშშ-ში სხვა მოთამაშეებთან მუშაობის შესაძლებლობაც მომეცა, მათ შორის ბრენდონ ინგრემთან.

მალე კი ლოს ანჯელესში გადავალ, სადაც ოფიციალურად გავაგრძელებ სანდროსთან მუშაობას, როგორც მისი პირადი ფოტოგრაფი, ვიდეოგრაფი და კონტენტ-კრეატორი, დიახ, იმიტომ, რომ მამუკელაშვილი ლეიკერსის მოთამაშე გახდა.

ამ ფოტოებზე ორი მეგობარია, რომლებიც 14 წლის ასაკში NBA-ზე ოცნებობდნენ. ორივემ აისრულა ოცნება.ერთი მსოფლიოს ერთ-ერთ ყველაზე ცნობილ გუნდში ლუკა დონჩიჩის გვერდით ითამაშებს. მეორე კი მოედნის კიდესთან, ვიდეოკამერით ხელში იქნება.

ორივეს გულში კი ყოველთვის იტალია დარჩება. წარმოიდგინეთ, NBA-ში მას ყველა უბრალოდ „სანდროს“ ეძახის, მისი ერთ-ერთი მიზანი კი ბიელაში სახლის შეძენაა. და ეს ყველაფერი კალათბურთისა და მეგობრობის დამსახურებით."