„მერე რატომ არ ითამაშე რეალში?“ — ტონი კროოსმა ობი მიკელის სახელით გავრცელებულ კრიტიკას უპასუხა

მადრიდის რეალის ყოფილმა ნახევარმცველმა, ტონი კროოსმა სოციალურ ქსელში ჩელსის ექს-ფეხბურთელს, ჯონ ობი მიკელის სახელით გავრცელებულ ციტატას უპასუხა.

„ტონი კროოსი საშუალო დონის ნახევარმცველია. სიმართლე გითხრათ, მე მასზე უკეთესი ფეხბურთელი ვიყავი. ერთადერთი განსხვავება ისაა, რომ მე რეალში არ მითამაშია. ვფიქრობ, უნდა შევცვალოთ აზროვნება, თითქოს რეალის მოთამაშე ავტომატურად სხვებზე უკეთესია. როცა ხედავ, რომ კროოსმა, ნაჩომ, კარვახალმა და მოდრიჩმა 5-5 ჩემპიონთა ლიგა მოიგეს, ეს უსამართლოდ მეჩვენება, რადგან ისინი თავიანთ პოზიციებზე საუკეთესოებთან ახლოსაც არ არიან.

ეს აჩვენებს, რომ ტიტულებს შეცდომაში შეყვანა შეუძლიათ. შემიძლია დავასახელო ათი ფეხბურთელი, რომლებიც მათზე უკეთესები არიან“, – ნათქვამია ნიგერიელის სახელით გავრცელებულ პოსტში.

როგორც Pulse Sports Nigeria იუწყება, თავად ობი მიკელმა ჯერ კიდევ გასულ წელს უარყო ეს სიტყვები, თუმცა ბოლო დღეებში ციტატამ პოპულარობის მეორე ტალღა მოიპოვა.

„მერე რატომ არ ითამაშე მადრიდის რეალში?“ – ასე უპასუხა კროოსმა Sportcatch-ის გვერდზე გამოქვეყნებულ პოსტს.

გერმანელს მხარი რეალის კიდევ ერთმა ფეხბურთელმა, დანი სებალიოსმაც დაუჭირა: „უკაცრავად, მაგრამ ტონი კროოსი უნიკალურია“.