„მესიმ ჩვენს ფეხბურთელებს გვერდი აუარა“, - ბენინის ნაკრებში უკმაყოფილებას არ მალავენ

ბენინის ნაკრების მთავარი მწვრთნელის ასისტენტმა, ტუნდე ადელაკუნმა, არგენტინის ნაკრები და ლიონელ მესი გააკრიტიკა.

მისი თქმით, მესის გამოსამშვიდობებელ მატჩში მონაწილეობის მისაღებად ჩასულ ფეხბურთელებს შეხვედრის შემდეგ სათანადო პატივისცემა არ გამოუჩინეს.

7 ოქტომბერს არგენტინამ ბენინი 3:0 დაამარცხა. მესიმ სანაკრებო კარიერის ბოლო შეხვედრაში ორი საგოლე გადაცემა შეასრულა და პენალტი გაიტანა.

ადელაკუნის თქმით, ბენინის ფეხბურთელებმა ბუენოს-აირესამდე რთული გზა გაიარეს და დიდი სურვილი ჰქონდათ, მესისთვის პატივისცემა პირადად გამოეხატათ, თუმცა მატჩის შემდეგ მასთან მიახლოების შესაძლებლობა არ მიეცათ.

„ჩვენი ახალგაზრდა ფეხბურთელები მესის აღმერთებენ. მათ მასთან ფოტოს გადაღება და ხელის ჩამორთმევა სურდათ, მაგრამ ეს ვერ შეძლეს. დაცვის თანამშრომლები მათ მიახლოების მცდელობას მტრულად ხვდებოდნენ. ისე გვწევდნენ უკან, თითქოს ჩვენი ბიჭები არეულობის მოსაწყობად იყვნენ მისულები“, - დაწერა ადელაკუნმა.

მისი განსაკუთრებული უკმაყოფილება მატჩის შემდეგ მესის საქციელმაც გამოიწვია.

„როცა მესი საპატიო წრეს ასრულებდა, ჩვენი რამდენიმე ფეხბურთელი მის სავარაუდო მარშრუტთან დადგა, რათა მისთვის ტაში დაეკრა. ბოლო მომენტში ლეომ მიმართულება შეცვალა და მოედნის ცენტრისკენ წავიდა.

ჩემი შეფასებით, მან ბენინის ფეხბურთელებს შეგნებულად აუარა გვერდი. ეს კიდევ ერთი გულდასაწყვეტი მომენტი იყო ადამიანისგან, რომელსაც ასე დიდ პატივს სცემდნენ“, - აღნიშნა მან.