მესის მემკვიდრე? ენცო ფერნანდესის სურვილი

ჩელსის ნახევარმცველმა, ენცო ფერნანდესმა ნაკრებში საკუთარ ამბიციებზე ისაუბრა და აღიარა, რომ მისი უდიდესი ოცნება არგენტინის ეროვნული გუნდის კაპიტნობაა, რომლის სამკლაურიც ამჟამად ლიონელ მესის ეკუთვნის.

25 წლის ფეხბურთელი 2022 წლის მუნდიალის შემდეგ ალბისელესტეს ნახევარდაცვის შეუცვლელ ფიგურად ჩამოყალიბდა.

ბუენოს-აირესში ხშირად მსჯელობენ იმაზე, თუ ვინ გადაიბარებს გუნდის ლიდერობას მას შემდეგ, რაც მესი სანაკრებო კარიერას დაასრულებს. ენცო ფერნანდესმა დაადასტურა, რომ ამ როლისთვის მზად არის, თუმცა გადაწყვეტილებას სამწვრთნელო შტაბს უტოვებს:

კაპიტნობა ჩემი ერთ-ერთი უმთავრესი ოცნებაა და ჩემთვის დიდი პატივი იქნება ამ სამკლაურის ტარება, თუმცა ყველაფერს დრო აჩვენებს

მიუხედავად დიდი ამბიციებისა, ჩელსის ნახევარმცველი აფასებს იმ პერიოდს, რომელსაც მოედანზე ინტერ მაიამის ვარსკვლავთან ერთად ატარებს. ენცომ მესის ისტორიაში საუკეთესო უწოდა და აღნიშნა, რომ მასთან ერთი გასახდელის გაზიარება უდიდესი პრივილეგიაა, რადგან ლეო მისი ბავშვობის კერპი იყო.

ფერნანდესის თქმით, ყატარის მუნდიალის შემდეგ ის როგორც ფეხბურთელი საგრძნობლად გაიზარდა, გახდა უფრო მომწიფებული და ლიდერული თვისებებიც შეიძინა, რაშიც ლონდონური კლუბიც ძალიან ეხმარება.

ახლა არგენტინის ნაკრები ჩემპიონის ტიტულის დასაცავად ემზადება და მიზნად ისეთივე ისტორიული შედეგის გამეორებას ისახავს, როგორიც ბრაზილიამ შორეულ 1962 წელს შეძლო. ვინაიდან ეს ტურნირი, დიდი ალბათობით, მესისთვის ბოლო მუნდიალი იქნება, გუნდში მოტივაცია პიკს აღწევს. არგენტინა ტიტულის დაცვას ალჟირთან მატჩით დაიწყებს, ჯგუფში მათი მომდევნო მეტოქეები კი ავსტრია და იორდანია იქნებიან.