MMA-ის მსოფლიო ჩემპიონატის 97+ კგ. წონითი კატეგორიის ფინალისტმა, გიორგი იმერლიშვილმა, მოახლოებულ სატიტულო ბრძოლაზე adjarabet arena-სთან ისაუბრა.
"ჯერჯერობით მეტოქეზე ბევრი არაფერი ვიცი. თვალი მოვკარი, რომ ფიზიკურად ძლიერი, დიდი გაბარიტების მქონე სპორტსმენია. ფინალამდე მხოლოდ 1 ბრძოლა მოუწია და მის სტილზე მხოლოდ ამით თუ მექნება წარმოდგენა. თუ როგორი ჩხუბი შეიძლება წავიდეს, ვფიქრობ, უშუალოდ ოქტაგონზე გადაწყდება. 1/2 ფინალშიც ასე იყო - დგომში ჩხუბი მინდოდა, მაგრამ ჭიდაობა გამომივიდა.
დედესთან ნახევარფინალისას, გულშემატკივრის შეძახილები მთელი ბრძოლის განმავლობაში მესმოდა - მკარნახობდნენ, მამხნევებდნენ და ჩემს დახმარებას ცდილობდნენ, რაც ძალიან ბევრს ნიშნავს და დიდი სტიმული მომცა.
მეორე მხრივ, გული მწყდება, რომ ტრიბუნებზე მაინც ცოტა ხალხია, მსოფლიო ჩემპიონატის დონის ტურნირი მეტ მაყურებელს იმსახურებს. იმედია, ფინალის დღეებში ეს გამოსწორდება და დარბაზიდან კიდევ უფრო მეტ მხარდაჭერას მივიღებთ", - თქვა იმერლიშვილმა adjarabet arena-სთან.
22 წლის ქართველი მებრძოლი ფინალში მასზე 1 წლით უფროს უკრაინელ ოლეკსანდრ ხოდაკოვს შეხვდება - 2 ოქტომბერს, 20:00 საათიდან.
იმერლიშვილის გარდა, MMA-ის მსოფლიო ჩემპიონატის ოქროს მედლისთვის კიდევ 3 ქართველი იჩხუბებს - მირზა გაჯიევი (79.4 კგ.), მარიამ თოფურია (79.4 კგ.) და ლექსო საბანაძე (იუნიორებში; 97+ კგ.). საბანაძე ოქტაგონზე 1-ელ ოქტომბერს გამოვა, დანარჩენი 3 ქართველი კი - 2 ოქტომბერს.
