„მილანი მადრიდის რეალის დონეზეა“ - მოდრიჩის საინტერესო განცხადება

ლუკა მოდრიჩი მილანში მეორე სეზონის გასატარებლად მზადაა.

ხორვატმა ვარსკვლავმა თავის ამბიციებსა და კლუბთან ერთად ტიტულებისთვის ბრძოლის სურვილზე ღიად ისაუბრა.

ესპანური გამოცემა AS-ის მიერ გავრცელებულ ინტერვიუში მოდრიჩი ამბობს:

გულის სიღრმეში ვიცოდი, რომ მილანში დარჩენა მსურდა, თუმცა სხვა ფაქტორებიც უნდა შემემოწმებინა. ახლა აქ ვარ და დაბრუნებით ძალიან ბედნიერი ვარ

 
გასულ სეზონში მილანი მარტამდე ტიტულისთვის იბრძოდა, თუმცა საბოლოოდ ჩემპიონთა ლიგის მიღმა დარჩა. მოდრიჩის თქმით, ეს ფაქტი და ტრავმის გამო გუნდის დახმარების შეუძლებლობა მისთვის დიდი იმედგაცრუება იყო. თუმცა, გასახდელში არსებული შესანიშნავი ატმოსფერო და მოთამაშეებს შორის პატივისცემა კლუბში დარჩენის ერთ-ერთი მთავარი მოტივაცია აღმოჩნდა.

ხორვატიის ნაკრებთან ერთად 2026 წლის მსოფლიო ჩემპიონატზე ყოფნისას, მოდრიჩი მილანთან მუდმივ კონტაქტზე იყო. როგორც თავად ამბობს, მას სურდა დარწმუნებულიყო, რომ ფეხბურთის თამაშის ძველი ვნება და სურვილი ჯერ კიდევ შენარჩუნებული ჰქონდა.

მოდრიჩმა ასაკის შესახებაც ისაუბრა:

ყველა ჩემს ასაკზე საუბრობს, ზოგიერთი თანაგუნდელი ჩემზე ორჯერ უმცროსია, მაგრამ ამაზე არ ვფიქრობ. ისინი თავს უფრო ახალგაზრდად მაგრძნობინებენ. მე უკიდურესად კონკურენტუნარიანი ვარ

ყველაზე საინტერესო განცხადება კი მოდრიჩმა მადრიდის რეალისა და მილანის შედარებისას გააკეთა:

მე ვთამაშობდი მსოფლიოს უდიდეს კლუბში, მადრიდის რეალში, მაგრამ ჩემი შეგრძნებით, მილანიც იმავე დონეზეა. ვინც მილანზე საუბრობს, მას სხვანაირად მოიხსენიებს, ვიდრე სხვა კლუბებს. როდესაც აქ მოდიხარ, ამას კარგად ხვდები. თავს ისე ვგრძნობ, თითქოს აქ უკვე წლებია ვარ, ეს კი მეტ მოტივაციას მაძლევს

დასასრულს, ხორვატმა აღნიშნა, რომ ასეთ კლუბში თამაშისას მთავარი მიზანი ყოველთვის ჩემპიონობა უნდა იყოს და არა მხოლოდ ჩემპიონთა ლიგაზე კვალიფიცირება.