პარი სენ-ჟერმენის ახალმა შემტევმა, ხვიჩა კვარაცხელიამ კლუბის არხთან ისაუბრა.
ხვიჩა, როგორ გრძნობ თავს პსჟ-ს მოთამაშედ?
"პატივია პსჟ-ს მაისურის ტარება. ჩემთვის ოცნება იყო, რომ მსოფლიოში ერთ-ერთ უდიდეს გუნდში მეთამაშა. ძალიან მიხარია და ჩვენ ერთად ვიბრძოლებთ ჩვენი ოცნებების ასასრულებლად."
რამ გადაგაწყვეტინა აქ მოსვლა?
"პროექტი არის ის, რამაც აქ მოსვლაში დამარწმუნა. ვიცი, რისი მიღწევა სურს კლუბს და როგორ მუშაობს ის მოთამაშეებთან. ეს ჩემთან თანხვედრაშია, აქ ბევრ დიდებულ ფეხბურთელს უთამაშია, ამიტომ ბევრი არ მიფიქრია, როცა პარიზში მოსვლის შესაძლებლობა მომეცა."
უკვე იცნობ კლუბის მოთამაშეებს?
"ზოგიერთ მოთამაშეს ვიცნობ, კი. ფაბიანს (რუისი), რომელთან ერთადაც ნაპოლიში ვითამაშე და ვიცნობ ჯიჯიოსაც (დონარუმა), რომელსაც პარი სენ-ჟერმენში გადმოსვლის წინ ვესაუბრე."
შენ ლუის ენრიკესთან ერთად იმუშავებ...
"ის ერთ-ერთი საუკეთესო მწვრთნელია მსოფლიოში. ვიცი, რომ მასთან მუშაობით ბევრს ვისწავლი და ძალიან მიხარია, რომ ის გამწვრთნის."
რა არის შენი მიზნები პარიზში?
"მინდა, რომ პარიზში მოსვლით ახალი გამოწვევები გამოვცადო, ახალი ოცნებები და ახალი მიზნები. მინდა, განვითარდე, რათა გუნდს როგორც შემიძლია დავეხმარო და ჩემი მაქსიმუმი გავიღო."
აღმოაჩინე პსჟ-ს კამპუსიც, როგორია შენი შთაბეჭდილება?
"კამპუსი საოცარია. ჩვენ ყველა საშუალება გვაქვს, რომ დიდებულ რაღაცებს მივაღწიოთ. ახალგაზრდებიც აქ არიან, რომელთაც ზრდისთვის და პროგრესისთვის ყველაფერი აქვთ. ეს როგორც ახალგაზრდებისთვის, ისე პროფესიონალური გუნდისთვისაც მნიშვნელოვანია."
მესიჯი გულშემატკივრებს?
"მინდა, რომ მათ მალე შევხვდე და გამოვცადო დიდებული ემოციები მათთან ერთად. ძალიან მიხარია, რომ აქაურობას შევუერთდი და მათ ძალიან მალე ვნახავ."
ოფიციალურად: კვარაცხელია პსჟ-ს ფეხბურთელია!
