მოდრიჩის კარიერის დასასრული ახლოვდება

ლუკა მოდრიჩის საფეხბურთო კარიერა, სავარაუდოდ, 2026 წლის მსოფლიო ჩემპიონატის დამთავრების შემდეგ დასრულდება.

მიუხედავად იმისა, რომ მას აქვს შესაძლებლობა, კიდევ ერთი წლით გაახანგრძლივოს კონტრაქტი მილანთან, ეს ნაკლებად სავარაუდოა.

მოდრიჩი, რომელიც სექტემბერში 41 წლის გახდება, 2025-26 წლების სეზონში მილანის ერთ-ერთი საკვანძო ფიგურა იყო და მასიმილიანო ალეგრის ხელმძღვანელობით 34-დან 32 მატჩი სასტარტო შემადგენლობაში დაიწყო, სანამ მაისში ლოყის ძვლის ტრავმას მიიღებდა.

როსონერის გარშემო არსებული არასტაბილური ვითარება (მთავარი მწვრთნელის, სპორტული დირექტორისა და ხელმძღვანელობის არარსებობა) და გუნდის მომავალ სეზონში ჩემპიონთა ლიგის მიღმა დარჩენა, ლეგენდარული ხორვატის გუნდიდან წასვლის ალბათობას ზრდის.

ესპანური გამოცემა AS-ის ცნობით, მოდრიჩი სერიოზულად ფიქრობს კარიერის დასრულებაზე. ამ გადაწყვეტილების შემთხვევაში, გავრცელებული ინფორმაციით, მის ყოფილ კლუბს, მადრიდის რეალს უკვე მზად აქვს შეთავაზება, რათა მოდრიჩმა კლუბის ხელმძღვანელობაში რაიმე როლი შეითავსოს.

თავად ფეხბურთელმა სოციალურ ქსელში ემოციური წერილი გამოაქვეყნა, რაც მილანთან დამშვიდობების მანიშნებლად აღიქმება: „ეს იყო სეზონი ლამაზი და რთული მომენტებით, მაგრამ ბოლოს უნდა შევეგუოთ რეალობას და ვაღიაროთ, რომ ისე არ დასრულდა, როგორც გვსურდა. მინდა გულითადად გადავუხადო მადლობა ყველა მილანელ გულშემატკივარს სიყვარულისა და პატივისცემისთვის. ფორცა მილან!“