მოქმედი ოლიმპიური ჩემპიონი დამარცხებულია - სულამანიძე 1/2 ფინალშია

პარიზის 2024 წლის ოლიმპიადაზე ძიუდოში კაცთა -100 კგ. წონით კატეგორიაში საქართველოს ღირსებას ილია სულამანიძე იცავს.

1/4 ფინალში ქართველი მოქმედ ოლიმპიურ ჩემპიონს იაპონელ აარონ ვულფს დაუპირისპირდა. ილიამ მეტოქეს ვაზარით აჯობა და სადებიუტო ოლიმპიადაზე 1/2 ფინალში გავიდა.

მისი მეტოქე მომდევნო ეტაპზე შვეიცარიელი დანიელ აიხი იქნება, რომელმაც ესპანეთის სახელით მოასპარეზე ნიკოლოზ შერაზადიშვილი დაამარცხა. ილია აიხს აქამდე 3-ჯერ შეხვდა სამივე შემთხვევაში მოახერხა მისი დამარცხება.

შერაზადიშვილი რეპეშაჟში აარონ ვულფს შეხვდება.

მეორე 1/2 ფინალურ წყვილში აზერბაიჯანელი ზელიმ კოცოიევი უზბეკ მუზაფარბეკ ტურობოიევს დაუპირისპირდება.

სულამანიძემ თავის სადებიუტო ოლიმპიადაზე ასპარეზობა 1/8 ფინალიდან დაიწყო. მისი მეტოქე იტალიელი ჯენარო პირელი იყო. ქართველმა პირველ შეხვედრაში მეტოქე 2 წუთში იპონით დაამარცხა და 1/4 ფინალში სწორედ ასე გავიდა. 

ფინალური ბლოკი 18:00-ზე დაიწყება.