მორატა: „რამდენიმე წლის წინ განადგურებული ვიქნებოდი, ახლა ვხვდები რომ არ ვიმსახურებ"

ალვარო მორატა მსოფლიო ჩემპიონატზე გამოუძახებლობაზე: მე არ ვიმსახურებდი განაცხადში ყოფნას.

კომოს თავდამსხმელმა, ალვარო მორატამ 2026 წლის მსოფლიო ჩემპიონატზე ესპანეთის ნაკრებში გამოუძახებლობაზე კომენტარი გააკეთა:

„ლუისმა [დე ლა ფუენტემ] დამირეკა და ვუთხარი: „მისტერ, რა თქმა უნდა, ვიცოდი [რომ მსოფლიოზე ვერ წავიდოდი]. სულელი არ ვარ“. ორიოდე წლის წინ სრულიად განადგურებული ვიქნებოდი, მაგრამ ახლა მესმის, რომ ასეც უნდა მომხდარიყო. მე არ ვიმსახურებდი მსოფლიო ჩემპიონატზე გამოძახებას. გასაგებია, რომ ეს ჩემი ბოლო შანსი იყო მუნდიალზე მეთამაშა და ესპანეთს მისი მოგება ნამდვილად შეუძლია. მაგრამ ასეთია ცხოვრება, ის ია-ვარდით მოფენილი არ არის. ვიცი, რომ სიმწიფისა და გამოცდილების წყალობით, სირთულეებს უკეთ ვუმკლავდები.

რა თქმა უნდა, იქ წასვლა ძალიან მინდოდა. გუნდს გულშემატკივარი ვიქნები. ნაკრებში ძალიან რთული პერიოდები მქონია, თუმცა, ამავდროულად, ეს არის ის, რაც ფეხბურთში ყველაზე მეტად მიყვარს.

მწყინს, რომ ფერნანდო [ტორესს] მხოლოდ ერთი გოლით ჩამოვრჩები. ეროვნული გუნდი არის ჯილდო იმისთვის, რომ თამაშით სიამოვნებას იღებ და შენს კლუბში წარმატებას აღწევ. მე ისევ უნდა დავიწყო ფეხბურთისგან სიამოვნების მიღება და იმედი მაქვს, ერთ დღეს ნაკრებში დაბრუნებას შევძლებ“, - განაცხადა მორატამ.