ვენგერი: "მბაპე რეალის განტევების ვაცია"

ფრანგული ფეხბურთის ლეგენდამ, არსენ ვენგერმა, კილიან მბაპეს დაუჭირა მხარი.

ვენგერმა განაცხადა, რომ ის 2026 წლის მსოფლიო ჩემპიონატზე კვლავ ერთ-ერთი გამორჩეული მოთამაშე იქნება, მიუხედავად იმისა, რომ გასულ სეზონში კრიტიკის ობიექტი გახდა.

27 წლის თავდამსხმელმა 2025/26 წლების სეზონში ყველა ტურნირზე 56 მატჩში 42 გოლი გაიტანა, თუმცა გუნდის წარუმატებელი სეზონის ფონზე კრიტიკაც არაერთხელ დაიმსახურა. მადრიდულმა კლუბმა სეზონი მნიშვნელოვანი ტიტულის გარეშე დაასრულა.

ვენგერის თქმით, მბაპეს მიმართ კრიტიკა გადაჭარბებულია და რეალის პრობლემები მხოლოდ ერთი ფეხბურთელის ბრალი ვერ იქნება:

რეალს სამი ან ოთხი მსოფლიო დონის ფეხბურთელი ჰყავს. ადრე ათი ჰყავდა. ფეხბურთში ყოველთვის საჭიროა განტევების ვაცი და სწორედ ასეთი ადამიანი გახდა მბაპე.

ფრანგი სპეციალისტი მიიჩნევს, რომ ბევრი ადამიანი მბაპეს მაღალ დონეს ვეღარ ამჩნევს მხოლოდ იმიტომ, რომ რეალს რთული სეზონი ჰქონდა. მისი აზრით, საფრანგეთის ნაკრების კაპიტანი მსოფლიო ჩემპიონატს შესანიშნავ ფორმაში და დიდი გამოცდილებით ხვდება.

მბაპემ 2025/26 წლების სეზონში ლა ლიგაში 25 გოლი გაიტანა და პიჩიჩის ჯილდოც მოიპოვა. მსოფლიო ჩემპიონატებზე კი უკვე 12 გოლი აქვს გატანილი. 2022 წლის მუნდიალზე მან 8 გოლი მიითვალა და საუკეთესო ბომბარდირი გახდა, ხოლო ფინალში არგენტინის წინააღმდეგ ჰეთ-თრიკიც შეასრულა. 2018 წელს კი საფრანგეთთან ერთად მსოფლიო ჩემპიონობა მოიპოვა.

ახლა მბაპე კიდევ ერთი მსოფლიო ჩემპიონატისთვის ემზადება და შეეცდება, რომ საკუთარი შთამბეჭდავი სანაკრებო კარიერა კიდევ უფრო გაამდიდროს.