რამდენიმე დღის შემდეგ, რაც შეერთებულ შტატებში შესვლაზე უარი ეთქვა, ომარ არტანს სამშობლოში როგორც გმირს დახვდნენ.
აეროპორტში მას მთავრობის წარმომადგენლები ყვავილებით შეხვდნენ, გულშემატკივრებმა კი ცისფერი სომალური დროშა მოახვიეს.
დედაქალაქ მოგადიშოში ათასობით ადამიანი სტადიონზე შეიკრიბა, არა საფეხბურთო მატჩისთვის, არამედ მსაჯის პატივსაცემად. იქ არტანი გულშემატკივრების შეძახილების ფონზე მხრებზე აიტაცეს და ის ეროვნული სიამაყის სიმბოლოდ იქცა ქვეყანაში, რომელიც მსოფლიო სცენაზე ხშირად უარყოფითად არის წარმოჩენილი.
„რაც მოხდა, მოხდა და ეს ბედისწერა იყო. მადლობელი ვარ იმ მხარდაჭერისთვის, რომელიც FIFA-მ გამიწია,“ - განუცხადა არტანმა ჟურნალისტებს მოგადიშოში ჩასვლის შემდეგ.
არტანი, რომელიც სომალის ისტორიაში მსოფლიო ჩემპიონატის პირველი მსაჯი უნდა გამხდარიყო, მხარდამჭერებს დაჰპირდა, რომ მიზანს არ დათმობს.
შემდეგ მსოფლიო ჩემპიონატზე აუცილებლად ვიქნები.
„უნდა ვიბრძოლოთ ჩვენი ქვეყნისთვის და დავიცვათ იგი. არასოდეს უნდა დავნებდეთ. მე მიყვარს ჩემი ქვეყანა და ახალგაზრდებს მოვუწოდებ, განაგრძონ საკუთარი მიზნებისკენ სწრაფვა.“ - უთხრა მან ადგილობრივ მედიას.
გასულ კვირას არტანს მაიამის საერთაშორისო აეროპორტში აშშ-ის საბაჟო და სასაზღვრო დაცვის სამსახურმა ქვეყანაში შესვლაზე უარი უთხრა.
მიუხედავად იმისა, რომ მას დიპლომატიური პასპორტი და მოქმედი ვიზა ჰქონდა, გადაწყვეტილება თეთრი სახლის მსოფლიო ჩემპიონატის სამუშაო ჯგუფის ხელმძღვანელმა ენდრიუ ჯულიანიმ დაიცვა.
„ვინც ისეთ პირებთან ურთიერთობს, რომლებიც ამერიკის შეერთებული შტატებისთვის ზიანის მიყენებას გეგმავენ, ქვეყანაში შესვლის უფლებას ვერ მიიღებენ,“ - განაცხადა მან.
ტრამპის ადმინისტრაციის ერთ-ერთმა წარმომადგენელმა, რომელმაც ანონიმურობის დაცვა ისურვა, განაცხადა, რომ არტანს „ტერორისტული ორგანიზაციების სავარაუდო წევრებთან“ ჰქონდა კავშირი.
FIFA-ს წარმომადგენლის თქმით, არტანი ვეღარ შეძლებს ტურნირზე მუშაობისთვის მომზადებას.
სომალიში აშშ ალ-ქაიდასთან დაკავშირებული დაჯგუფება „ალ-შაბაბის“ წინააღმდეგ ბრძოლაში მნიშვნელოვანი პარტნიორია. თუმცა, ამერიკული ბრალდებები სომალელ მოქალაქეებში აღშფოთებას იწვევს.
სომალის პარლამენტის წევრმა ილჰამ გასერმა განაცხადა:
ბევრი სომალელი ფიქრობს, რომ მას უსამართლოდ მოექცნენ. თუ მართლაც არსებობდა საფუძვლიანი ეჭვი, რომ კონკრეტულ ადამიანს ტერორისტულ ორგანიზაციებთან კავშირი ჰქონდა, ბევრი სომალელი კითხულობს - რატომ არ გამოვლინდა ეს საკითხი ვიზის გაცემის პროცესში?
გასულ წელს სომალი იმ 12 ქვეყანას შორის მოხვდა, რომელთა მიმართაც აშშ-მ მასშტაბური სამოგზაურო აკრძალვა აამოქმედა.
პრეზიდენტი დონალდ ტრამპი არაერთხელ გამოთქვამდა შეურაცხმყოფელ შეფასებებს სომალიზე, მის მოსახლეობას „ნაგავს“ უწოდებდა, ქვეყანას კი „ალბათ ყველაზე ცუდ და ყველაზე სახიფათო ქვეყნად“ და „ჯოჯოხეთად“ მოიხსენიებდა.
არტანისთვის შექმნილი დაბრკოლება საბოლოოდ ეროვნული სიამაყის მომენტად იქცა, რადგან სომალი საკუთარ წარმომადგენელს მსოფლიო სცენაზე აღნიშნავს.
მიუხედავად იმისა, რომ მსოფლიო ჩემპიონატზე მუშაობის შესაძლებლობა ამჯერად ხელიდან გაუშვა, მის მიერ სამშობლოში მოპოვებული აღიარება შეუმჩნეველი არ დარჩენილა.
