ბენფიკას მთავარმა მწვრთნელმა, ჟოზე მოურინიომ, კვლავ თავისი ფეხბურთელის, ჯანლუკა პრესტიანის ირგვლივ ატეხილ რასისტულ სკანდალზე ისაუბრა.
ინციდენტი 17 თებერვალს, ბენფიკა — რეალის პირველ შეხვედრაში მოხდა. ვინისიუს ჟუნიორმა მსაჯ ფრანსუა ლეტექსიეს აცნობა, რომ პრისტიანიმ მას „მაიმუნი“ უწოდა. მიუხედავად იმისა, რომ არგენტინელი ბრალდებას უარყოფს, უეფამ იგი განმეორებითი მატჩი მიმდინარე გამოძიების გამო გამოატოვებინა.
თავად მოურინიომ პირველი მატჩის შემდეგ ინციდენტის გარკვეული ბრალეულობა ვინისიუსს აკიდა, როცა განაცხადა, რომ ბრაზილიელს გატანილი გოლი უფრო მოკრძალებულად უნდა აღენიშნა და, უცნაური დამთხვევაა, რომ ყველა მოედანზე, სადაც ვინისიუსი თამაშობს, ანალოგიური რამ ხდება. ეს კომენტარი არ მოეწონათ მადრიდის რეალშიც და ალვარო არბელოამ ამაზე საჯაროდაც ისაუბრა.
„მე მიყვარს ალვარო [არბელოა] და კვლავ მეყვარება, მაგრამ ვფიქრობ, სწორი პოზიცია დავიკავე. არ მინდა რომელიმე მხარის დაცვა ან თავდასხმა. მირჩევნია არც რეალის თეთრი მაისური მოვირგო და არც ბენფიკას წითელი ამ სერიოზულ სიტუაციაში.
გირჩევთ, გაეცნოთ ადამიანის უფლებათა საყოველთაო დეკლარაციას. მე ვგმობ ყოველგვარ დისკრიმინაციას. თუ დამტკიცდება, რომ ჩემმა ფეხბურთელმა ამ პრინციპებს გადაუხვია, მისი კარიერა ჩემთან და ამ კლუბში დასრულდება.
მე უმეცარი არ ვარ და უდანაშაულობის პრეზუმფციიდან ამოვდივარ. უეფამ ფეხბურთელის მოსაკვეთად 416328-ე მუხლი გამოიყენა. თუ ის მართლაც დამნაშავეა, მასზე ისე აღარ შევხედავ, როგორც ადრე. თუმცა, მანამდე ყოველთვის უნდა ვკითხო საკუთარ თავს: „რა იქნება, თუ?..“ — აღნიშნა ჟოზემ.
