მადრიდის რეალი მომავალ სეზონამდე გუნდის ფორმირებაზე მუშაობას აგრძელებს და მიკი ვან დე ვენის სახელი ამ კვირას ბრიტანული გაზეთის პირველ გვერდზე მოხვდა.
Sunday Mirror Sport-ის ინფორმაციით, ნიდერლანდელი ცენტრალური მცველი ჟოზე მოურინიოსა და მადრიდის რეალის ინტერესის სფეროშია, რადგან ორივე მხარე კონატესა და დუმფრისის დამატების შემდეგ დაცვის ხაზის კიდევ უფრო გაძლიერებას ცდილობს.
ფეხბურთელი, რომელმაც კარიერა ვოლენდამის აკადემიაში დაიწყო, შემდეგ ვოლფსბურგში გადავიდა და ტოტენჰემის ყურადღებაც მიიპყრო, გავრცელებული ცნობებით, ლონდონური კლუბის დატოვებას და კარიერაში ახალი ეტაპის დაწყებას ისურვებდა.
მისმა სატრანსფერო ღირებულებამ შესაძლოა 50 მილიონ ევროს გადააჭარბოს, თუმცა ინგლისში უფრო მაღალი თანხაც სახელდება - დაახლოებით 85 მილიონი ევრო, რაც დღევანდელი ბაზრის პირობებში ცენტრალური მცველისთვის საკმაოდ დიდი თანხაა.
ვან დე ვენი ნიდერლანდების ნაკრების შემადგენლობაში მსოფლიო ჩემპიონატზე ითამაშებს და ეცდება, ეს ტურნირი ევროპის წამყვანი კლუბების ყურადღების მისაპყრობად გამოიყენოს.
ნიდერლანდელ მცველს, რომელიც თავისი პოზიციისთვის გამორჩეული ფიზიკური მონაცემებით გამოირჩევა, შესაძლო დანიშნულების ადგილებად ლივერპულსა და მანჩესტერ იუნაიტედსაც უკავშირებენ. მის მიმართ ინტერესს ბარსელონაც იჩენს.
„მიკი სრულად აკმაყოფილებს იმ მოთხოვნებს, რასაც მოურინიო ეძებს. მადრიდის რეალი მზად არის, ის დაიმატოს“, - ციტირებს Mirror-ის მიერ მოყვანილ წყაროს გამოცემა.
ვან დე ვენი მადრიდელთა დაცვის გაძლიერების ერთ-ერთ შესაძლო ვარიანტად იოშკო გვარდიოლთან და რიკარდო კალაფიორისთან ერთად განიხილება.
ამჟამად სამეფო კლუბს დაცვის ცენტრში ედერ მილიტაო (ტრავმირებული), ანტონიო რუდიგერი, დინ ჰუისენი და რაულ ასენსიო ჰყავს, ხოლო დავიდ ალაბა კონტრაქტის ამოწურვის შემდეგ გუნდიდან მიდის.
