რეალი ოლისეს ტრანსფერის აჟიოტაჟს დიომანდეს შესაძენად იყენებდა?

მადრიდის რეალი და ლაიფციგი 19 წლის ვინგერის, იან დიომანდეს ტრანსფერზე შეთანხმებასთან ძალიან ახლოს არიან.

როგორც ჟურნალისტი სანტი აუნა (Foot Mercato) იტყობინება, გერმანული კლუბის მიერ პირველი შეთავაზების (100 მლნ €) უარყოფის შემდეგ, სამეფო კლუბმა მეორედაც სცადა და მხარეები ამჟამად 120 მილიონი ევროს (ბონუსების ჩათვლით) ოდენობის პაკეტზე მუშაობენ.

თავად ფეხბურთელს მადრიდში გადასვლაზე უკვე თანხმობა აქვს მიცემული.

ტრანსფერის პროცესში საინტერესო დეტალიც იკვეთება. იწერება, რომ რეალმა ბაზარზე მიზანმიმართულად გამოიყენა მაიკლ ოლისეს გარშემო ატეხილი ხმაური და ყურადღება გადაიტანა, სანამ გერმანიაში დიომანდეს საქმეს აგვარებდა.

ადრეული ცნობებით, ახალგაზრდა ვინგერის მთავარი პრიორიტეტი პარი სენ-ჟერმენი იყო და პარიზელებს პირადი თანხმობაც ჰქონდათ, თუმცა ლაიფციგის მაღალი ფინანსური მოთხოვნებისა (120–130 მილიონი ევრო) და გერმანელების სურვილის გამო, რომ ფეხბურთელი კიდევ ერთი წელი შეენარჩუნებინათ, პსჟ-მ კონკურენციაზე უარი თქვა.

ჟოზე მოურინიომ გუნდს შეტევაში მეტი სიჩქარე მოსთხოვა, დიომანდე კი სწორედ ის მოთამაშეა, რომელსაც შეტევის ორივე ფლანგზე ბრწყინვალედ თამაში და ტემპის შეცვლა შეუძლია. ახლა მხარეებს შორის მხოლოდ ფეხბურთელის ხელფასის დეტალების შეთანხმებაღა დარჩა.