„მზად ვიყავით დრო მიგვეცა", — ტოტენჰემმა ფრანკის გაშვების მიზეზი დაასახელა

ტომას ფრანკმა ტოტენჰემი დატოვა. ლონდონურმა კლუბმა 52 წლის სპეციალისტის გაშვების შესახებ ოფიციალური განცხადება გამოაქვეყნა. ის დეზებს 2025 წლის ივნისიდან ხელმძღვანელობდა.

კლუბის განცხადებაში ნათქვამია, რომ ხელმძღვანელობა მზად იყო ფრანკისთვის დრო და მხარდაჭერა მიეცა, თუმცა ბოლო პერიოდის შედეგებმა და გუნდის მაჩვენებლებმა დირექტორთა საბჭო იმ დასკვნამდე მიიყვანა, რომ სეზონის ამ ეტაპზე ცვლილებები აუცილებელია. კლუბმა მწვრთნელს გაწეული შრომისთვის მადლობა გადაუხადა და მომავალში წარმატებები უსურვა.

ტოტენჰემის კრიზისი ციფრებში საკმაოდ მძიმედ გამოიყურება: გუნდს პრემიერ ლიგაში ბოლო რვა მატჩია არ მოუგია, ბოლო 17 შეხვედრიდან კი მხოლოდ ორში შეძლო გამარჯვების მოპოვება. გუშინ დეზები ნიუკასლთან 1:2 დამარცხდნენ.

ამ დროისთვის ტოტენჰემი ინგლისის ჩემპიონატის სატურნირო ცხრილში მე-16 ადგილს იკავებს. გუნდს 26 ტურის შემდეგ მხოლოდ 29 ქულა აქვს და გასავარდნ ზონასთან სახიფათოდ ახლოსაა.