ნაპოლიმ სტადიო მარადონაზე ბოლონიასთან დრამატული მარცხი (2:3) იწვნია, რამაც ანტონიო კონტეს გუნდის ჩემპიონთა ლიგის საგზურისთვის ბრძოლა კითხვის ნიშნის ქვეშ დააყენა.
მასპინძლებს მოგება ოთხეულში ადგილს გარანტირებულად უნაღდებდა, თუმცა ბოლონიამ გამარჯვება მსაჯის მიერ დამატებულ დროში ჯონათან როუის საოცარი მაკრატელა დარტყმით მოიპოვა.
ნაპოლის ამ შეხვედრაში არაერთი წამყვანი მოთამაშე აკლდა - კევინ დე ბრუინმა ვარჯიშზე სახის ძვლის ტრავმა მიიღო, ასევე ვერ ითამაშეს რომელუ ლუკაკუმ და დავიდ ნერესმა. სამაგიეროდ, მოედანზე სამთვიანი პაუზის შემდეგ დაბრუნდა გუნდის კაპიტანი ჯოვანი დი ლორენცო.
ბოლონიამ მატჩი აქტიურად დაიწყო და ფედერიკო ბერნარდესკის შორეული დარტყმით დაწინაურდა, მოგვიანებით კი რიკარდო ორსოლინიმ პენალტით სხვაობა ორამდე გაზარდა. ნაპოლიმ ბრძოლა შეძლო. ჯერ დი ლორენცომ გაიტანა დაბრუნების აღსანიშნავი გოლი, მეორე ტაიმის დასაწყისში კი ალისონ სანტოსმა აღადგინა წონასწორობა. როდესაც ყველას ეგონა, რომ მატჩი ფრედ დასრულდებოდა, როუმ აკრობატული დარტყმით სტუმრებს სამი ქულა მოუტანა.
ამ შედეგით ნაპოლიმ ჩემპიონთა ლიგის ზონაში პოზიციების განმტკიცების შანსი ხელიდან გაუშვა.
