ნეიმარი უეინ რუნის წინააღმდეგ.
ეს სადისკუსიო თემა სოციალურ ქსელებში მას შემდეგ აფეთქდა, რაც ინგლისელმა ბრაზილიელის კარიერაზე კრიტიკული მოსაზრება გამოთქვა. ჩვენ გადავწყვიტეთ, ემოციები გვერდზე გადავდოთ და ციფრებს გადავხედოთ: როგორ გამოიყურება მათი სტატისტიკური შედარება?
„ნეიმარი მომწონს, მაგრამ მას არასდროს აღვიქვამდი უმაღლესი დონის მოთამაშედ. ვგულისხმობ მესის და რონალდუს კატეგორიას“, - განაცხადა რუნიმ პოდკასტ The Overlap-ის ახალ რუბრიკაში, რომელსაც სიმბოლურად „არაპოპულარული მოსაზრებები“ ჰქვია.
რუნის სკანდალური განცხადება: იყო ნეიმარი მაღალი დონის?
რუნის ეს რეპლიკა გარი ნევილის სიტყვებზე პასუხი იყო, რომელმაც თქვა: „პრემიერლიგის ისტორიაში არცერთი ფეხბურთელი არ ყოფილა პიკში მყოფ ნეიმარზე უკეთესი“. რუნიმ ცეცხლზე ნავთი კიდევ უფრო დაასხა, როდესაც აღნიშნა, რომ საუკეთესო ფორმაში მყოფი მოჰამედ სალაჰიც კი სჯობდა ბრაზილიელს. ამას იან რაიტის პასუხიც მოჰყვა: „სალაჰი ნეიმარზე უკეთესი არ არის. ამ საკითხზე უეინს ნამდვილად უნდა ვედავო“.
2010-იანი წლების დიდ ნაწილში ნეიმარი მსოფლიოს მესამე საუკეთესო ფეხბურთელად მიიჩნეოდა, მხოლოდ მესისა და რონალდუს შემდეგ. 2013 წელს ის სანტოსიდან ბარსელონას შეუერთდა და მესისთან და ლუის სუარესთან ერთად ლეგენდარული შემტევი ტრიო ჩამოაყალიბა.
თუმცა, 2017 წელს პსჟ-ში გადასვლის შემდეგ, გაჩნდა მოსაზრება, რომ ფორვარდმა საკუთარი პოტენციალი ბოლომდე ვერ გამოიყენა, მიუხედავად იმისა, რომ გოლების გატანას სტაბილურად აგრძელებდა.
საინტერესოა, რომ მსგავსი არგუმენტი ხშირად რუნის მისამართითაც ისმის, მიუხედავად მისი უამრავი ტიტულისა მანჩესტერ იუნაიტედსა და ინგლისის ნაკრებში. ევრო 2004-ის შემდეგ ბევრს ეგონა, რომ რუნი თავისი თაობის საუკეთესო მოთამაშე გახდებოდა, თუმცა მომდევნო სანაკრებო ტურნირებზე მან გულშემატკივრები გარკვეულწილად გააწბილა.
გარდა ამისა, მანჩესტერ იუნაიტედში ის დიდხანს იმყოფებოდა კრიშტიანუ რონალდუს ჩრდილში, სანამ პორტუგალიელი რეალ მადრიდში გადავიდოდა. ამის მიუხედავად, რუნი რჩება იუნაიტედის ყველა დროის საუკეთესო ბომბარდირად და პრემიერლიგის ისტორიაში ერთ-ერთ უდიდეს ფიგურად.
ორივე, ნეიმარიც და რუნიც, ბრწყინვალე ფეხბურთელები იყვნენ, მაგრამ კითხვამ, ვინ იყო მათ შორის უკეთესი, ინტერნეტსივრცე ორად გაყო.
