ეროვნული ლიგის 2025 წლის სეზონის გამარჯვებული იბერია 1999 გახდა, მისმა მწვრთნელმა გუგა ნერგაძემ კი აღსანიშნავი შედეგი დააფიქსირა.
ჯერ განვმარტოთ, რომ პრეზიდენტმა ტარიელ ხეჩიკაშვილმა იბერიელებს სეზონის მიმდინარეობისას მწვრთნელი 2-ჯერ გამოუცვალა - ჩემპიონობაში 18-თამაშიანი წვლილი ლევან კორღალიძეს აქვს, ერთ მატჩში მთავარი მწვრთნელის მოვალეობას ანზორ ცხვიტავა ასრულებდა, 7 შეხვედრაში ტექნიკურ ზონაში გია გეგუჩაძე იმყოფებოდა, საჩემპიონო ბოლო 10 ტურში (9 მოგება და 1 წაგება) კი გუნდს სწორედ 29 წლის ნერგაძე უძღვებოდა.
უჩა სოსიაშვილის შემდეგ, ნერგაძე ეროვნული ლიგის ისტორიაში მე-2 ყველაზე ახალგაზრდა მწვრთნელია, რომელმაც ტიტული მოიგო.
სოსიაშვილმა რეკორდი 2014-15 წლების სეზონში დაამყარა, როცა გორის დილას ისტორიაში ერთადერთი ჩემპიონობა 25 წლისა და 10 თვის ასაკში მოაგებინა. ნერგაძემ, იბერიასთან ერთად, ამ შედეგს 29 წლისა და 2 თვის ასაკში მიაღწია.
მან მწვრთნელობა 2019 წლის ივლისში დაიწყო და 2025 წლის მაისამდე იბერიას აკადემიის ასაკობრივ გუნდებში მუშაობდა, 2 მაისიდან 2 ოქტომბრამდე იბერია 2-ის მთავარი მწვრთნელი გახლდათ, რის შემდეგაც პირველი გუნდი ჩააბარეს.
