კომპანია MVP-ის პირველი და უაღრესად წარმატებული MMA ტურნირის შემდეგ, ორგანიზატორები მომავალ ივენთზე კიდევ უფრო დიდ შოუს აანონსებენ.
გასულ შაბათს გამართული პირველი ტურნირი, რომელიც ნეტფლიქსის ეთერში გადაიცემოდა, რონდა რაუზისა და ჯინა კარანოს 10-წლიანი პაუზის შემდეგ დაბრუნებით იყო გამორჩეული. რაუზიმ მეტოქე სულ რაღაც 17 წამში დაამარცხა.
მიუხედავად იმისა, რომ მთავარი ბრძოლა ძალიან სწრაფად დასრულდა, ტურნირის მაყურებელთა რაოდენობამ რეკორდულ ნიშნულს - თითქმის 12 მილიონს მიაღწია, რაც აშშ-ის ისტორიაში MMA ივენთებისთვის ყველაზე მაღალი მაჩვენებელია. თუმცა, ექსპერტები და ფანები ეჭვობენ, შეძლებს თუ არა ორგანიზაცია ამ წარმატების გამეორებას ვარსკვლავური წყვილის გარეშე.
ამ ეჭვებს MVP-ის თანადამფუძნებელმა და პრომოუტერმა, ნაკისა ბიდარიანმა უპასუხა და მიანიშნა, რომ შემდეგი ტურნირის მთავარი მოვლენა ჯეიკ პოლის ოქტაგონზე დებიუტი იქნება. „დარწმუნებული ვარ, ჯეიკ პოლის ბრძოლა ნებისმიერ მეტოქესთან MVP MMA-ის ეგიდით, რეიტინგების მხრივ სრულიად საკმარისი იქნება“, - აღნიშნა ბიდარიანმა.
29 წლის იუთუბერმა, რომელიც კრივში გადავიდა, MMA-ში შესაძლო ძალების მოსინჯვაზე არაერთხელ ილაპარაკა. ტურნირის მიმდინარეობისას მან და ფრენსის ნგანუმ ერთმანეთში სიტყვებიც კი გაცვალეს, თუმცა პოლის დებიუტი ყოფილ მძიმეწონოსან ჩემპიონთან გამორიცხულია. ორგანიზატორები მომავალი ივენთებისთვის სხვა ვარიანტებსაც განიხილავენ, მათ შორის მაიკ პერისა და ნეიტ დიასის რევანშს.
