„სიარულიც კი მიჭირს“ - პრატესის აღიარება

კარიერაში ჩატარებულმა თითქმის 140-მა ორთაბრძოლამ კარლოს პრატესის სხეულზე მძიმე კვალი დატოვა.

მიმდინარე თვის დასაწყისში, პერტში გამართულ ტურნირზე ჯეკ დელა მადალენასთან კარიერის საუკეთესო გამარჯვების შემდეგ, 32 წლის ბრაზილიელმა მებრძოლმა აღიარა, რომ ყოველდღიურად გაუსაძლის ტკივილებს უმკლავდება.

არიელ ჰელვანის შოუში სტუმრობისას პრატესმა განაცხადა, რომ კარიერის დასრულებას 35 ან 36 წლის ასაკში გეგმავს, რაც იმას ნიშნავს, რომ სპორტში მხოლოდ 3-4 წელი დარჩა. მისი თქმით, კიკბოქსინგსა და შერეულ ორთაბრძოლებში მიღებულმა უამრავმა ტრავმამ მისი ორგანიზმი მთლიანად დააზიანა.

„დილით საწოლიდან რომ ვდგები, ნორმალურად სიარულიც კი არ შემიძლია. დაახლოებით 20 წუთი მჭირდება ლოდინი, სანამ ზურგის, კისრისა და ფეხების ტკივილი ცოტათი მაინც არ ჩაცხრება. ეს ყოველდღე ასე ხდება“, - აღნიშნა მებრძოლმა და დაამატა, რომ ტკივილების გამო ღამითაც ცოტა სძინავს. მისი თქმით, სპორტში დიდხანს დარჩენაზე აზრს მხოლოდ ჰონორარზე დაწერილი ბევრი ნული თუ შეაცვლევინებს.

ამჟამად პრატესი ქვესაშუალო წონის საჩემპიონო ბრძოლას ელოდება და მზად არის, ოქტაგონზე 2026 წლის ბოლომდე აღარ გავიდეს. ის დარწმუნებულია, რომ მისი შემდეგი მეტოქე ისლამ მახაჩევისა და იან მაჩადო გარის საჩემპიონო დაპირისპირებაში გამარჯვებული იქნება.