შონ დაიჩმა დაადასტურა, რომ ნოტინგემ ფორესტმა ოლექსანდრ ზინჩენკოსთან მისი მომავლის შესახებ მოლაპარაკებები გამართა.
უკრაინის ნაკრების ფეხბურთელს არსენალიდან იჯარით გადმოსვლის შემდეგ რთული პერიოდი ჰქონდა, პრემიერ ლიგაში მხოლოდ ოთხი მატჩი დაიწყო ძირითად შემადგენლობაში, ხოლო ფორესტის ევროპა ლიგის განაცხადში იგი ტრავმის შემდეგ გამოჯანმრთელებულმა ოლა აინამ შეცვალა.
დაიჩი ფლანგის მცველს იმ სათამაშო დროის შესახებ ესაუბრა, რომლის მიღებასაც ის მომავალში უნდა ელოდოს, ახლა როცა აინამ ბარძაყის უკანა კუნთის ტრავმა მოირჩინა.
29 წლის ზინჩენკო იმ სამ ფეხბურთელს შორის იყო, რომლებიც გასულ კვირას, ვრექსემთან FA თასზე მარცხისას, შესვენებაზე შეცვალეს და შაბათს მის მშობელ კლუბ არენალთან მატჩში თამაშის უფლებაც არ ექნება.
„ფეხბურთელთან ვისაუბრეთ, მის მდგომარეობაზე ყველაფერი ნათლად ავუხსენით, ის ინფორმირებულია და ვნახოთ, რა მოხდება,“ - თქვა დაიჩმა მატჩისწინა პრესკონფერენციაზე.
„ჩვენ ღიად ვესაუბრებით მას, ის ნამდვილი პროფესიონალია, ყოველთვის ასე იყო და დარწმუნებული ვარ, მომავალშიც ასე დარჩება.“
ფორესტს იანვარში ზინჩენკოს ერთსეზონიანი იჯარის შეწყვეტის შესაძლებლობა არ აქვს, ხოლო არსენალს უკვე სრულად შევსებული ჰყავს თავისი განაცხადი.
ამიტომ, თუ ფორესტი ზინჩენკოს გაშვებას გადაწყვეტს, სავარაუდოდ საჭირო იქნება მესამე კლუბის ინტერესი. მას ამ სეზონში არსენალის შემადგენლობაში არ უთამაშია, შესაბამისად უკრაინელს კვლავ აქვს უფლება ახალ გუნდში ითამაშოს.
