მილანის მფლობელმა, RedBird-ის შეფმა ჯერი კარდინალემ გუნდში მასშტაბური წმენდა ჩაატარა და თანამდებობიდან მთავარი მწვრთნელი მაქს ალეგრი, სპორტული დირექტორი იგლი ტარე, გენერალური დირექტორი ჯორჯო ფურლანი და ტექნიკური დირექტორი ჟოფრე მონკადა ერთდროულად გაათავისუფლა.
კლუბში ერთადერთი ხელშეუხებელი პირი სპეციალური მრჩეველი ზლატან იბრაჰიმოვიჩი აღმოჩნდა.
რადიკალური გადაწყვეტილების მიზეზი სერია A-ს ბოლო ტურში კალიარისთან სახლში განცდილი სენსაციური მარცხი (1:2) გახდა. ჩემპიონთა ლიგის საგზურის გასანაღდებლად მილანს კომოსთან ორქულიანი უპირატესობის ფონზე მხოლოდ 1 ქულა სჭირდებოდა, თუმცა გუნდმა უმოტივაციო მეტოქესთან მატჩი ჩააგდო და მეოთხე ადგილი დაკარგა.
კლუბის ოფიციალურ ვებგვერდზე გავრცელებულ განცხადებაში ხელმძღვანელობამ სეზონს სრული კრახი უწოდა:
გასული წლის იმედგაცრუების შემდეგ, მფლობელების მთავარი მიზანი ჩემპიონთა ლიგაზე დაბრუნება და სერია A-ში სტაბილური გამარჯვებების ბაზის შექმნა იყო. სეზონის უდიდესი ნაწილი პირველ ორ პოზიციაზე ვიმყოფებოდით და სკუდეტოსთვის რეალურად ვიბრძოდით. თუმცა, ფინალური მონაკვეთი სრულიად შეუსაბამო იყო ამ მაჩვენებლებთან, ხოლო ბოლო ტურის მარცხმა ეს სეზონი ცალსახა წარუმატებლობად აქცია. დროა შეიცვალოს და სრულად რეორგანიზდეს საფეხბურთო ოპერაციები
მაქს ალეგრიმ და იგლი ტარემ მილანში მხოლოდ 12 თვე გაატარეს, რადგან გუნდში გასულ ზაფხულს მივიდნენ. ალეგრიმ მიმდინარე სეზონში 42 მატჩი ჩაატარა, სადაც 22 გამარჯვება, 10 ფრე და 10 მარცხი მოიპოვა. ჯორჯო ფურლანი კლუბის მმართველობაში 2019 წლიდან იყო, ხოლო ჟოფრე მონკადა მთავარ სკაუტად 2018 წლიდან მუშაობდა. ჯერი კარდინალე და ზლატან იბრაჰიმოვიჩი ახალი სეზონისთვის კლუბის სრულიად ახალი სტრუქტურის, გენერალური დირექტორისა და მთავარი მწვრთნელის შერჩევაზე მუშაობას უკვე შეუდგნენ.
