ოფიციალურად: მიულერი ვანკუვერის მოთამაშეა

ვანკუვერ უაითქეფსის ოფიციალური გვერდის ცნობით, თომას მიულერი კლუბის ახალი ფეხბურთელია.

გერმანელი მოთამაშე კარიერას MLS-ში გააგრძელებს. მან კანადურ კლუბთან კონტრაქტი 2026 წლის დეკემბრამდე გააფორმა.

მიუნხენის ბაიერნში მოგებული 13 ბუნდესლიგისა და 2 ჩემპიონთა ლიგის შემდეგ, მსოფლიო ჩემპიონმა თომას მიულერმა რეკორდმაისტერი დატოვა და ამიერიდან ოკეანის მიღმა ითამაშებს.

მიულერმა ბაიერნთან ერთად ჯამში 33 ტიტული მოიგო, მან ყველა ტურნირზე ჩატარებულ 756 მატჩში 250 გოლი გაიტანა და 276 საგოლე გადაცემა მიითვალა.

გერმანიის ნაკრებში გამართულ 131 შეხვედრაში მიულერის ანგარიშზე 45 გოლი და 41 საგოლე გადაცემაა, 2014 წელს კი ის ბუნდესნაკრებთან ერთად მსოფლიო ჩემპიონი გახდა.