სერხიო პერესის თქმით, რედ ბულში ვერცერთი მრბოლელი გადარჩება.
პერესი რედ ბულს 2021 წელს შეუერთდა. მას შემდეგ, რაც 2023 წელს მრბოლელთა ჩემპიონატში მაქს ვერსტაპენს დიდი სხვაობით ჩამორჩა და მეორე ადგილი დაიკავა, მისი შედეგები გასულ წელს მკვეთრად გაუარესდა, რაც სეზონის ბოლოს გუნდიდან მის წასვლამდე მივიდა.
რედ ბულმა გადაწყვიტა, ვერსტაპენის პარტნიორად ლიამ ლოუსონი მიეყვანა. თუმცა, ახალზელანდიელმა მხოლოდ ორ ეტაპს გაძლო, სანამ გუნდმა იგი იუკი ცუნოდათი არ ჩაანაცვლა, რომელსაც თავადაც აქვს სირთულეები ბოლიდთან მუშაობაში.
პერესი, რომელიც მომავალ წელს კადილაკთან ერთად დაბრუნდება რბოლებში, თანაგრძნობით ეკიდება რედ ბულის მეწყვილეებს, რომლებთაც მისი გზის გამეორება მოუწიათ.
„მე არ მიყვარს იმ მრბოლელების კრიტიკა, რომლებიც ახლა იქ არიან, რადგან მეც იმ პოზიციაში ვიყავი, ზუსტად ვიცი, რისი გავლა უწევთ მათ. იმ წუთს, როცა რედ ბულთან ჩემს წასვლაზე შეთანხმებას მივაღწიეთ, ვიფიქრე - ‘საწყალი ის ბიჭი, ვინც აქ მოვა’.“ - უთხრა პერესმა Sky F1-ს
ისაკ ჰაჯარს აქტიურად უკავშირებენ მომავალ წელს რედ ბულში დაწინაურებას, მისი წარმატებული ახალწვეულობის სეზონის ფონზე.
თუმცა, პერესის თქმით, ეს ფრანგისთვის არასწორი ნაბიჯი იქნება, რადგან ვეცერთი მოქმედი მრბოლელი ვერ გაუმკლავდება იმ გამოწვევას, რაც რედ ბულში ვერსტაპენის გვერდით ყოფნას მოაქვს.
„ეს ძალიან რთული ადგილია, რა თქმა უნდა, მაქსის გვერდით ყოფნა ისედაც რთულია, მაგრამ მაქსის გვერდით ყოფნა რედ ბულში – ეს სრულად სხვა რაღაცაა, რასაც ადამიანები ვერ ხვდებიან." – თქვა პერესმა.
„შეიძლება უამრავი რამ გითხრათ, მაგრამ ეს უბრალოდ ძალიან რთული სამუშაოა მრბოლელისთვის. ვერავინ გადარჩება იქ. არ აქვს მნიშვნელობა, მოიყვანთ ჰამილტონს თუ ლეკლერს - ვინც არ უნდა იყოს, მას უზარმაზარი სირთულეები ექნება.“ - განაცხადა მექსიკელმა.
