ფიფამ ფეხბურთის ისტორიაში ერთ-ერთი ყველაზე დიდი სკანდალის გამოძიება დაასრულა და ორი ეროვნული ფედერაციის ყოფილ ხელმძღვანელებს უმკაცრესი სანქციები დააკისრა.
გამოძიებით დადასტურდა, რომ ჩინოვნიკებმა პანდემიის დროს კოვიდ-19-თან საბრძოლველად გამოყოფილი ფონდებიდან თანხები პირად ანგარიშებზე გადარიცხეს.
მალდივების ფეხბურთის ასოციაციის ყოფილ პრეზიდენტს, ბასამ ადილ ჯალილს ფეხბურთთან დაკავშირებული ნებისმიერი საქმიანობა სამუდამოდ აეკრძალა და 1 მილიონი შვეიცარიული ფრანკის (დაახლოებით 1.23 მილიონი დოლარი) გადახდა დაეკისრა. ჯალილმა ფიფას მიერ გამოყოფილი დახმარება პირად ანგარიშზე ჩარიცხა და ფუფუნების კლასის ბინები შეიძინა. იგი ამჟამად ფინანსური კორუფციის ბრალდებით 32-წლიან პატიმრობას იხდის. ამავე საქმეზე მალდივების ასოციაციის ყოფილ ფინანსურ დირექტორს, მოჰამედ აქილს 10-წლიანი დისკვალიფიკაცია და 100 000 შვეიცარიული ფრანკის ჯარიმა დაეკისრა.
ანალოგიური უმკაცრესი სასჯელი გამოუტანეს კარიბის ზღვის აუზის ქვეყნის, მონსერატის ფეხბურთის ასოციაციის ყოფილ პრეზიდენტს, ვინსენტ კასელსაც, რომელსაც სამუდამო ბანი და 1 მილიონი შვეიცარიული ფრანკის ჯარიმა დააკისრეს. ამავე ფედერაციის ყოფილ გენერალურ მდივანს, ტანდიკა ჰიუზს კი 15-წლიანი დისკვალიფიკაცია და 150 000 შვეიცარიული ფრანკი მიესაჯა.
ფიფაში ხაზგასმით აღნიშნეს, რომ ეს გადაწყვეტილებები ორგანიზაციის აბსოლუტურ პრინციპულობას ასახავს, რათა საფეხბურთო ფონდები და განსაკუთრებით ჰუმანიტარული კრიზისებისთვის განკუთვნილი რესურსები დაცული იყოს.
