ფულის მითვისება და ჯანი ინფანტინოს მფარველობა? - სამუელ ეტო’ო სკანდალში ეხვევა

ბრიტანული გამოცემა The Times-ის ინფორმაციით, კამერუნის ფეხბურთის ფედერაციის პრეზიდენტი სამუელ ეტო’ო სკანდალში გაეხვა.

ვრცელდება ცნობები, რომ კამერუნელმა ლეგენდამ ფედერაციის კუთვნილი დაახლოებით 568 000 ევრო დოჰაში, საკუთარ პირად ანგარიშზე გადარიცხა. აღნიშნული თანხა 2023 წლის ოქტომბერში, მოსკოვში რუსეთისა და კამერუნის ეროვნულ ნაკრებებს შორის გამართული ამხანაგური მატჩიდან მიღებული შემოსავალი იყო.

კამერუნის ფეხბურთის ფედერაციის ყოფილმა წევრებმა ფიფას ეთიკის კომიტეტს გამოძიების დაწყების თხოვნით ჯერ კიდევ ერთი წლის წინ მიმართეს, თუმცა პასუხი დღემდე არ მიუღიათ. ფედერაციის ყოფილმა წარმომადგენელმა, ჟურნალისტმა გიბაი გატამამ განაცხადა:

ჩემი ინფორმაციით, არ არსებობს არანაირი საბუღალტრო თუ საბანკო დოკუმენტი, რომელიც დაამტკიცებს, რომ სამუელ ეტო’ოს პირად ანგარიშზე გადარიცხული თანხა შემდგომში ფედერაციის ოფიციალურ ანგარიშზე გადაირიცხა. კამერუნულ ფეხბურთში ჩართული ადამიანები ფიფას დუმილს სამუელ ეტო’ოს პოლიტიკურ და ინსტიტუციურ მხარდაჭერად აღიქვამენ

ადგილობრივებში ჩნდება ეჭვი, რომ ეტო’ოს ფიფას პრეზიდენტი ჯანი ინფანტინო მფარველობს, რომელთანაც მას მჭიდრო მეგობრობა აკავშირებს. ფიფამ ნებისმიერი სახის ზეწოლა უარყო და განაცხადა, რომ ორგანიზაციის პრეზიდენტი დამოუკიდებელ ორგანოთა გადაწყვეტილებებზე გავლენას არ ახდენს.

სამუელ ეტო’ო ბრალდებებს უარყოფს, თუმცა ინფანტინოსთან ახლო ურთიერთობას არ მალავს:

ჩემს გულში პრეზიდენტი ჯანი ფეხბურთის სამყაროს ფიგურაზე ბევრად მეტი გახდა, ძმა, უფროსი ძმა, მეგობარი, რომლის აღზევებასაც თვალს ვადევნებდით, ვისაც მხარს ვუჭერდით და ვისთან ერთადაც ავაშენეთ ის, რაც ფეხბურთს ემსახურება

45 წლის ეტო’ო, რომელიც ოთხჯერ დასახელდა აფრიკის წლის საუკეთესო ფეხბურთელად, კარიერის განმავლობაში ისეთი გრანდების ღირსებას იცავდა, როგორებიცაა მადრიდის რეალი, ჩელსი, ბარსელონა და მილანის ინტერი.