ემილიო ბუტრაგენიომ ბენფიკასთან ჩემპიონთა ლიგის პლეი-ოფის მოახლოებული მატჩი შეაფასა.
რეალის წარმომადგენელმა ნიონში გამართული წილისყრის შემდეგ Realmadrid TV-სთან ისაუბრა:
„ლისაბონში ვბრუნდებით. უცნაურია, რადგან მათ წინააღმდეგ 60 წლის განმავლობაში არ გვითამაშია და ახლა ერთი თვის განმავლობაში სამ მატჩს ჩავატარებთ. კარგი შედეგი უნდა მოვიპოვოთ. მათ ჩვენთან შესანიშნავი მატჩი ჩაატარეს და საკუთარი ძლიერი მხარეები აჩვენეს. ეს უნდა დაგვეხმაროს, რომ პირველ შეხვედრისთვის კარგად მოვემზადოთ, კარგი შედეგი მივიღოთ და ბერნაბეუს მხარდაჭერით მერვედფინალში გავიდეთ.
მატჩს გამარჯვების სურვილით უნდა მივუდგეთ. ჩვენ ისეთი გუნდი ვართ, რომელიც ყოველთვის გამარჯვებისთვის თამაშობს. მართალია, მეორე შეხვედრა ჩვენს სტადიონზე გაიმართება, მაგრამ პირველ მატჩში უნდა გავაგზავნოთ გზავნილი და ვაჩვენოთ, რომ მოსაგებად მივდივართ.
გვყავს შემტევი ფეხბურთელები, რომლებსაც ნებისმიერ მომენტში შეუძლიათ თამაშის გადაწყვეტა, და ეს უნდა გამოვიყენოთ. გვჭირდება მყარი დაცვა, მაგრამ ვიცით, რომ ჩვენი ძალის მნიშვნელოვანი ნაწილი შეტევაშია და მაქსიმალურად უნდა გამოვიყენოთ ეს უპირატესობა.
ახლა ორი კვირა გვაქვს და ეს უნდა დაგვეხმაროს ვარჯიშში, ტრავმებისგან აღდგენაში და დასვენებაში. ეს პერიოდი სრულად უნდა გამოვიყენოთ ყველაფრისთვის, რაც წინ გველოდება. რა თქმა უნდა, ამას დიდი ენთუზიაზმით ვხვდებით. ახლა იწყება ყველაფერი კარგი და თითოეულ მატჩს შეუძლია მიგვაახლოვოს ან დაგვაშოროს ტიტულს.
უნდა გავაგრძელოთ იმ ენერგიითა და ერთიანობით, რაც აქამდე გვიჩვენებია. დიდი ტალანტი გვაქვს და იმედი მაქვს, ტრავმირებული ფეხბურთელებიც დაგვიბრუნდებიან. ეს გადამწყვეტი ფაზაა და ძალიან მნიშვნელოვანი იქნებოდა, რომ არბელოას თითქმის მთელი შემადგენლობა ჰყოლოდა ხელმისაწვდომი.“ - განაცხადა ბუტრაგენიომ.
ისევ ჟოზე რეალის წინააღმდეგ - ჩემპიონთა ლიგის პლეი-ინის წყვილები გაირკვა
